"კონსტიტუცია უნდა იყოს იდეოლოგიურად ნეიტრალური და სწორედ ასეთი სახით იქნება ჩამოყალიბებული კონსტიტუციის, ჩვენი ძირითადი კანონის ტექსტი," - ამის შესახებ პარლამენტის თავმჯდომარემ კონფერენციაზე - "კონსტიტუციის 94-ე მუხლი და ეფექტური სახელმწიფო" განაცხადა.

პარლამენტის თავმჯდომარის განცხადებით, ცალკე მუხლი დაეთმობა სოციალური სახელმწიფოს პრინციპს და ასევე, დაგეგმილია ეკონომიკური თავისულებას შესახებ სპეციალური მუხლის დამატება. მისივე თქმით, ორივე პრინციპი აისახება საქართველოს კონსტიტუციის პირველ თავში.

"მთავარი ამოცანა საკონსტიტუციო რეფორმის ფარგლებში იყო ყველაზე სწორი ბალანსის პოვნა ამ ორ ძირითად ინტერესს შორის, ორ ფუნდამენტურ პრინციპს შორის," - განაცხადა კობახიძემ.

მისივე თქმით, საქართველოს კონსტიტუციაში იმგვარი ცვლილებების შეტანაა დაგეგმილი, რომლებიც სოციალური სახელმწიფოს და ეკონომიკური თავისუფლების პრინციპების რეალიზებისათვის სათანადო გარანტიებს შექმნის:

"ვიცით, რომ არის გარკვეული კოლიზიური დამოკიდებულება ამ ორ პრინციპს შორის, თუმცა, მეორეს მხრივ, ეს ორი პრინციპი არის ერთმანეთთან თავსებადი და ჰარმონიზებადი. ჩვენი ამოცანა გახლავთ სწორედ ამ ჰარმონიის და თავსებადობის უზრუნველყოფა ორ ფუნდამენტურ პრინციპს შორის - ეს არის სოციალური სახელმწიფოს პრინციპი და ეკონომიკური თავისუფლების პრინციპი."

ქვეყნის უმაღლეს კანონზე საკონსტიტუციო კომისია სამი თვეა მუშაობს. კომისია სამუშაო ჯგუფებში გამართულ შეხვედრებს გაერთიანებულ სხდომაზე შეაჯამებს, რომელზეც უკვე განხილული საკითხების კენჭისყრა მოხდება. შემაჯამებელი სხდომის გამართვა კვირის ბოლოს იგეგმება.