The Heritage Foundation-ის ეკონომიკური თავისუფლების 2022 წლის ინდექსში საქართველოს მდგომარეობა 14 პოზიციით გაუარესდა და ქვეყანამ 71,8 ქულით 26-ე ადგილი დაიკავა. 2021 წელს საქართველო 77,2 ქულით იყო შეფასებული და მსოფლიოს ქვეყნების ჩამონათვალში მე-12 ადგილს იკავებდა.

ორგანიზაცია ქვეყნებს 0-დან 100 ქულამდე სისტემით აფასებს. განახლებულ რეიტინგში საქართველოსთვის მინიჭებული 71,8 ქულა ბოლო 10 წელში უპრეცედენტოდ დაბალია — ქვეყანას ამაზე ნაკლები ქულა ბოლოს 2012 წელს ჰქონდა.

ინდექსი ქვეყნებში არსებულ ეკონომიკურ თავისუფლებას კანონის უზენაესობის, მთავრობის ზომის, რეგულაციების ეფექტიანობისა და საბაზრო თავისუფლების მიხედვით აფასებს.

როგორც ანგარიშიდან ირკვევა, საქართველოს პოზიციები 12-დან 8 კრიტერიუმში გაუარესებულია. უფრო კონკრეტულად, ყველაზე დიდი ვარდნა ფისკალური სიჯანსაღის (შემცირებულია 27,8 ქულით), შრომითი უფლებების (შემცირებულია 14,8 ქულით) და ბიზნესის თავისუფლების (შემცირებულია 10,8 ქულით) მიმართულებით ფიქსირდება. აქვე უნდა ითქვას, რომ ბოლო ერთ წელში საქართველოს პოზიცია გაუმჯობესებულია მხოლოდ თავისუფალი ვაჭრობის კრიტერიუმში.

"პოლიტიკური ჩარევა სასამართლო სისტემის დამოუკიდებლობას ძირს უთხრის. ბევრი მოსამართლე მოკლებულია შესაძლებლობას, დამოუკიდებლად ან სწრაფად განიხილოს კომერციული დავები. საერთაშორისო გამჭვირვალობა საქართველოში ელიტურ კორუფციაზე საურობს: მაღალი თანამდებობის პირები იურიდიულ ხარვეზებს პირადი გამდიდრების, სტატუსისა და ანგარიშწორების მიზნით იყენებენ", — წერია ანგარიშში.

რაც შეეხება რეგიონის ქვეყნებს, 2022 წლის მსოფლიო რეიტინგში სომხეთი 58-ე, აზერბაიჯანი 75-ე, თურქეთი 107-ე, ხოლო რუსეთი 113-ე ადგილს იკავებს.

უნდა აღინიშნოს, რომ მეზობელი ქვეყნებისგან განსხვავებით საქართველო "უმეტესად თავისუფალი" ეკონომიკების ჯგუფში რჩება. ამასთან, ევროპის მასშტაბით ქვეყანა მე-18 ადგილზეა.

ეკონომიკური თავისუფლების ინდექსში სინგაპური, შვეიცარია, ირლანდია და ახალი ზელანდია ლიდერობენ.