ქართული ოცნების თავმჯდომარის, ირაკლი კობახიძის განცხადებით, ბადრი ჯაფარიძის, ელენე ხოშტარიასა და შალვა ნათელაშვილისთვის სადეპუტატო მანდატების შეწყვეტის გადაწყვეტილება ემსახურებოდა ქვეყნის დამშვიდებას. მისი თქმით, ამ დეპუტატების მიზანი იყო ქვეყნის არევა, ხოლო ქართული ოცნებას მათთან დაპირისპირება "უწევდა", რათა ქვეყანას სიმშვიდე შეენარჩუნებინა.

"თქვენ გახსოვთ რამდენად რთული და ცხელი იყო ვითარება ერთი წლის წინ და ამ ცხელი ვითარების შემოქმედთა შორის განსაკუთრებით აქტიურობდნენ ის პირები, რომლებსაც დღეს შევუწყვიტეთ უფლებამოსილება, ესენი არიან ელენე ხოშტარია, შალვა ნათელაშვილი და ბადრი ჯაფარიძე.

ჩვენ მათ წინააღმდეგ მიმართული ქმედებებით, ამას ხაზგასმით ვამბობ, მოვახერხეთ ქვეყნის დამშვიდება. მათი მიზანი იყო ქვეყნის არევა, ჩვენი მიზანი იყო ქვეყნის დამშვიდება და გვიწევდა მათთან დაპირისპირება იმისათვის, რომ ქვეყანას შეენარჩუნებინა სიმშვიდე. შესაბამისად, ეს გადაწყვეტილებაც ამ სამი დეპუტატის მიმართ, რა თქმა უნდა, ემსახურება ქვეყნის დამშვიდებას", — ამბობს ის.

დღეს პარლამენტმა ლელოს ლიდერ ბადრი ჯაფარიძეს, ლეიბორისტული პარტიის ლიდერ შალვა ნათელაშვილსა და დროას ლიდერ ელენე ხოშტარიას სადეპუტატო მანდატი შეუწყვიტა.

პრეზიდენტ სალომე ზურაბიშვილის განცხადებით, დღევანდელი გამოწვევებიდან გამომდინარე, დეპუტატებისთვის მანდატის შეწყვეტას არ ეთანხმება.