კოალიცია მედიის ადვოკატირებისთვის, განცხადებას ავრცელებს, სადაც ნათქვამია, რომ საზოგადოებრივ მაუწყებელზე მიმდინარე საკადრო ცვლილებები ადასტურებს 2016 წლის არჩევნების შემდეგ გავრცელებულ ინფორმაციას GDS-ზე საზოგადოებრივ-პოლიტიკური პროგრამების დახურვისა და მაუწყებელზე GDS-ის თანამშრომელთა გადაყვანის გეგმის შესახებ.

კოალიციის განცხადებით, საზოგადოებრივ მაუწყებელზე 30 თანამშრომლის დამატება, რომელთაგან უმეტესობა ყოფილი GDS-ელია, აჩვენებს, რომ შესაბამისი გეგმა ახალი გენერალური დირექტორის მიერ, რომელიც ასევე GDS -ის ყოფილი თანამშრომელია, მართლაც ხორციელდება.

არასამთავრობოების კოალიციის განცხადებით, GDS-ის თანამშრომელთა საზოგადოებრივ მაუწყებელზე დასაქმებას მენეჯმენტი ნიუსრუმის ახალი საჭიროებებით ასაბუთებს, თუმცა ამავე დროს ისინი მხოლოდ ნიუსრუმში არ საქმდებიან:

"გავრცელებული მონაცემები აჩვენებს, რომ ახლადმიღებული კადრები მხოლოდ ე.წ. გაერთიანებულ ნიუსრუმში არ საქმდებიან. ახალი კადრების მიღება წინ უსწრებს მაუწყებელზე გამოცხადებულ კონკურსს გადაცემების შესარჩევად".

კოალიცია მედია ადვოკატირების მიერ გავრცელებულ განცხადებაში ნათქვამია ისიც, რომ საზოგადოებრივი მაუწყებლის სამეურვეო საბჭოს წევრის, სულხან სალაძის მიერ გავრცელებული მონაცემებით, ახლადმიღებულ თანამშრომელთა ანაზღაურება თვეში 80 ათას ლარს აღწევს:

"მაუწყებლის ახალი მენეჯმენტი პირველივე დღიდან თანხების დაზოგვის აუცილებლობაზე საუბრობდა და ამ მიზნით თანამშრომელთა მასობრივ დათხოვნასაც კი გეგმავდა".


კოალიცია იმედს გამოთქვამს, რომ საკონკურსო კომისია შეძლებს საზოგადოებრივი მაუწყებლის და არა მენეჯმენტის ინტერესების დაცვას, წარმოდგენილი პროექტების პროფესიული კრიტერიუმებით შეფასებას და წარდგენას საზოგადოებისათვის.


კოალიციის წევრი ორგანიზაციები:

  • საქართველოს ახალგაზრდა იურისტთა ასოციაცია
  • მედიაკლუბი
  • საქართველოს ჟურნალისტური ეთიკის ქარტია
  • ინფორმაციის თავისუფლების განვითარების ინსტიტუტი
  • ფონდი „ღია საზოგადოება - საქართველო“
  • საქართველოს რეგიონულ მაუწყებელთა ასოციაცია
  • არასამთავრობო ორგანიზაცია „სამოქალაქო საზოგადოებისათვის“
  • ლევან მიქელაძის სახელობის ფონდი
  • საქართველოს რეგიონული მედიის ასოციაცია
  • სატელევიზიო ქსელი
  • საქართველოს მცირე და საშუალო სატელეკომუნიკაციო ოპერატორების ასოციაცია
  • მედიის მხარდაჭერის ფონდი