ოკუპირებული აფხაზეთის დეფაქტო რეჟიმს გაეროში "დამკვირვებელი სახელმწიფოს" სტატუსი სურს. ამის შესახებ ე.წ. საგარეო საქმეთა მინისტრმა, ინალ არძინბამ განაცხადა.

საოკუპაციო რეჟიმი მიიჩნევს, რომ ეს სტატუსი მათ საშუალებას მისცემს, გაეროს გენერალური ასამბლეის დისკუსიებში მიიღონ მონაწილეობა. არძინბა ამბობს, რომ ორგანიზაციის ერთ-ერთი მთავარი ფუნქცია პატარა და დიდ ერებს შორის თანასწორობის უზრუნველყოფაა, ამიტომ საოკუპაციო რეჟიმის მტკიცებით, უნდათ მსოფლიომ აფხაზეთის ხმა გაიგოს. ეს მოთხოვნა არძინბამ რუსეთში, მათ ე.წ. საელჩოში გააჟღერა.

ამას საქართველოს საგარეო საქმეთა სამინისტრო გამოეხმაურა და მას პროპაგანდისტული ნაბიჯი უწოდა, რომელიც ყველანაირ რეალურ განხორციელებას მოკლებულია.

"საქართველოს სუვერენიტეტი და ტერიტორიული მთლიანობა აღიარებულია საერთაშორისო საზოგადოების მიერ საერთაშორისოდ დადგენილ საზღვრებში. საერთაშორისო თანამეგობრობა არ ცნობს საქართველოს ოკუპირებული ტერიტორიების ე.წ. დამოუკიდებლობას", — განაცხადა საგარეო საქმეთა სამინისტროს პრესსპიკერმა, მარი ნარჩემაშვილმა.

მისი თქმით, "დამოუკიდებელი" სუბიექტის იმიჯის განმტკიცების მიზნით, საოკუპაციო რეჟიმებს სხვა დროსაც ჰქონიათ მსგავსი პროპაგანდისტული ნაბიჯის მცდელობა, რომელიც საგარეოს თქმით, როგორც წესი, კრახით სრულდება.