უკრაინის რადას დეპუტატი, სალომია ბობროვსკა აცხადებს, რომ უკრაინა საქართველოს მთავრობისა და პარლამენტისგან მხარდაჭერას ელოდა. მისი თქმით, მათ იციან, რომ საქართველო მათ გვერდით დგას, თუმცა მათ უფრო კონკრეტული და მკაფიო მხარდაჭერის მოლოდინი ჰქონდათ.

"გულწრფელად გეტყვით, რომ საქართველოს მთავრობისა და პარლამენტის მხარდაჭერას ველოდებოდით. როდესაც რადაში პარტნიორი ქვეყნების დროშები გამოვფინეთ, მათ შორის საქართველოს დროშა არ იყო. ვიცით, რომ საქართველო ჩვენს გვერდით დგას, თუმცა ჩვენ უფრო კონკრეტულ და მკაფიო მხარდაჭერას ველოდებოდით. დღეს ჩვენთან გაერთიანებული ოპოზიციის წევრები ჩამოვიდნენ და ეს ძალიან კარგი მესიჯია. ვნერვიულობთ საქართველოში მიმდინარე პროცესებისა და იმ მიმართულების გამო, სადაც ჩვენი მეგობარი ქვეყანა მიდის", — აცხადებს რადას დეპუტატი [მთავარი არხის თარგმანი].

ბობროვსკას თქმით, ევროპელი პარტნიორების მიერ საქართველოზე საუბრის დროს გამოთქმული შეშფოთება სწყინს და ფიქრობს, რომ დღევანდელი რთული გამოწვევების ფონზე აუცილებელია გაერთიანება და დასავლეთისკენ სვლის გაგარძელება.

"ძალიან მწყინს, როდესაც ჩვენი კოლეგები და ევროპელი პარტნიორები საქართველოზე საუბრის დროს ღრმა შეშფოთებებს გამოთქვამენ. ღმერთმა არ ქნას, რომ საქართველო ბელარუსის გზას დაადგეს და რუსეთს დაუახლოვდეს. დღეს რთული გამოწვევების წინაშე ვდგავართ და აუცილებელია, რომ გავერთიანდეთ და დასავლეთისკენ სვლა გავაგრძელოთ. მინდა, რომ უკრაინამ და საქართველომ ერთიანი სამხედრო წვრთნები ხშირად ჩაატარონ. ჩვენი ქვეყნებისთვის ევროატლანტიკური ინტეგრაციის გზაზე ეს მნიშვნელოვან როლს შეასრულებს", — განაცხადა მან.

რადას კიდევ ერთი დეპუტატის, ივანა კლიმპუშ-ცინცაძის განცხადებით, მათ დიდი სურვილი აქვთ და ელოდებიან, რომ უკრაინაში მალე საქართველოს ოფიციალური პირებიც ჩავლენ. დეპუტატი აღნიშნავს ოპოზიციის მხარდაჭერას და ამბობს, რომ თუ უკრაინა ვერ გადარჩება, ვერ გადარჩება ვერც საქართველო.

"საქართველოსა და პოლონეთის პარლამენტმა უკრაინის მხარდამჭერი რეზოლუციები შეიმუშავეს და ეს ჩვენთვის ძალიან მნიშვნელოვანია. უკრაინაში ბევრი დასავლელი პარტნიორი ჩამოვიდა და ჩვენს ქვეყანას მხარდაჭერა გამოუცხადეს. დიდი სურვილი გვაქვს და ველოდებით, რომ მალე ქართველი ოფიციალური პირებიც ჩამოვლენ. ინფორმაცია გვქონდა, რომ პარლამენტის უმრავლესობის წევრებს ჩამოსვლა ჰქონდათ გადაწყვეტილი, თუმცა მათ ეს ვიზიტი გააუქმეს. მადლობელი ვარ ქართველი ოპოზიციონერების, რომლებიც დღეს აქ არიან და მხარდაჭერას გვიცხადებენ.

რუსეთი არამხოლოდ ჩვენ, არამედ მთელ თავისუფალ სამყაროს ებრძვის. თუ უკრაინა ვერ გადარჩება, ვერ გადარჩება საქართველოც, ამიტომ ჩვენს ინტერესებშია, რომ საერთო მტერს ერთიანი ძალებით დავხვდეთ", — განაცხადა მან [მთავარი არხის თარგმანი].

ერთიანი ნაციონალური მოძრაობის, ლელოსა და დროას წარმომადგენლები კიევში ჩავიდნენ, რათა შექმნილი ვითარებიდან გამომდინარე უკრაინისთვის მხარდაჭერა დაეფიქსირებინათ.

პარტია დროამ უკრაინისა და საქართველოს დროშები, რომელზეც მოქალაქეებმა მხარდაჭერის ნიშნად წარწერები გააკეთეს, უკრაინა-საქართველოს მეგობრობის ჯგუფსა და საქართველოს ოპოზიციურ პარტიებს შორის გამართულ შეხვედრაზე გადასცეს. ასევე, ლელოს ლიდერებმა რადაში ოფიციალური შეხვედრის დაწყებამდე საქართველოს დროშა აღმართეს. მათი თქმით, ეს თანადგომისა და სოლიდარობის პოლიტიკური აქტი იყო.

გაიგე მეტი:

• მხოლოდ უკრაინა არ იქნება, უნდა ვიფიქროთ საქართველოზე, მოლდოვასა და სხვა ქვეყნებზე — ჯონსონი
• ვოლსკი რეზოლუციაზე: რა დავაკელით? რომ თითი არ დავუქნიეთ და არ ვთქვით, ის ცუდი ბიჭი ისა?
• ხოშტარია მოქალაქეებს სთავაზობს, ხელი მოაწერონ უკრაინისა და საქართველოს დროშებს, რომლებსაც კიევში ჩაიტანს