25 იანვრის ვაჭრობის შედეგად ლარი დოლართან და ევროსთან მიმართებით გამყარდა.

დღეს დადგენილი კურსის მიხედვით, ერთი დოლარის ღირებულება 3,072 ლარი გახდა, რაც აქამდე მოქმედ კურსთან შედარებით 0,43 თეთრით გამყარებას ნიშნავს. აღსანიშნავია, რომ ეროვნული ვალუტა დოლართან მიმართებით ბოლო 17 თვის მაქსიმალურ ნიშნულამდეა გამყარებული.

რაც შეეხება ევროს, ამ ვალუტასთან მიმართებით ლარი 1,47 თეთრით გამყარდა და ერთი ევრო 3,4661 ლარს გაუტოლდა. ლარი ევროსთან მიმართებით ამაზე მყარი ბოლოს 19 თვის წინ, 2020 წლის 11 ივლისს იყო.

შეგახსენებთ, რომ ლარის კურსის მერყეობის შესამცირებლად, საქართველოს ეროვნულმა ბანკმა გასულ წელს 9 სავალუტო ინტერვენცია განახორციელა და ჯამურად 332,9 მლნ დოლარი გაყიდა. მათ შორის, ბოლო სავალუტო აუქციონი 30 სექტემბერს შედგა, სადაც ეროვნულმა ბანკმა 60 მილიონი დოლარი გაყიდა.

სებ-ის მიერ დღეს დადგენილი გაცვლითი კურსი ხვალ, 26 იანვარს შევა ძალაში.