ჯანდაცვის მინისტრის მოადგილის, თამარ გაბუნიას განცხადებით, კორონავირუსის დადასტურებული შემთხვევების დიდი ნაწილი არის შედარებით ახალგაზრდა ასაკობრივ ჯგუფში, თუმცა ჰოსპიტალურ სექტორზე ზეწოლის მატება არ აღინიშნება.

"შემთხვევების დიდი ნაწილი არის შედარებით ახალგაზრდა ასაკობრივ ჯგუფში. აღსანიშნავია ისიც, რომ ბოლო პერიოდში შემთხვევების მატების მიუხედავად, არ აღინიშნება ზეწოლის მატება ჰოსპიტალურ სექტორზე. ჰოსპიტალურ სექტორში რჩება 4 431 პაციენტი, რეანიმაციულ განყოფილებაში 281, ინტენსიურ თერაპიას იტარებს 1 083 პაციენტი, 4 000-ზე მეტი საწოლი არის თავისუფალი, ამდენად ჰოსპიტალური სექტორის შესაძლებლობა მიიღოს პაციენტები, თუ ამის საჭიროება იქნება არსებობს", — განაცხადა გაბუნიამ საკოორდინაციო საბჭოს სხდომის დასრულების შემდეგ.

18 იანვრის მონაცემებით, საქართველოში კორონავირუსის 7 521 ახალი შემთხვევა დადასტურდა, გამოჯანმრთელდა 3 160, ხოლო გარდაიცვალა — 31 ადამიანი.

ბოლო 24 საათში ქვეყნის მასშტაბით ჩატარდა 56 367 კვლევა ტესტით, მათ შორის ანტიგენის სწრაფი ტესტით — 38 892, ხოლო PCR-ით — 17 475.

Stopcov.ge-ზე გამოქვეყნებული ინფორმაციის თანახმად დადებითობის დღიური მაჩვენებელი არის 13,34%, ბოლო 7 დღის — 10%, ხოლო 14 დღის — 10,26%.