სახელმწიფო უსაფრთხოების სამსახურის ანტიკორუფციულმა სააგენტომ დიდი ოდენობით თაღლითობის მცდელობის ბრალდებით საქართველოს მოქალაქე მაია ბ. დააკავა.

გამოძიების ვერსიით, ბრალდებული მოქალაქეს სახელმწიფო უსაფრთხოების სამსახურში მუშაობის დაწყებას დაჰპირდა, რის სანაცვლოდაც 7 ათასი აშშ დოლარის გადახდა მოსთხოვა.

სუს-ის განცხადებით, ბრალდებულმა მოქალაქეს განუმარტა, რომ სამსახურში მოწყობამდე საჭირო იყო აღნიშნული თანხის ნახევრის - 3 500 აშშ დოლარის წინასწარ გადახდა.

ბრალდების მხარის მტკიცებით, მაია ბ-მ ხსენებულ მოქალაქეს მოტყუებით, თაღლითურად გამოართვა მოთხოვნილი თანხის ნაწილი - 3 500 აშშ დოლარი. უწყების ცნობით, იგი სწორედ დანაშაულის ჩადენის დროს ბრალდებულის სახით დააკავეს.

გამოძიება დიდი ოდენობით თაღლითობის მცდელობის ფაქტზე, საქართველოს სსკ-ის 19-180-ე მუხლის მე-3 ნაწილის ბ ქვეპუნქტით, მიმდინარეობს რაც 6-დან 9 წლამდე თავისუფლების აღკვეთას ითვალისწინებს.