დროა ქართული ოცნების თავმჯდომარის, ირაკლი კობახიძის განცხადებას საქართველოს მთავარ პარტნიორებზე თავდასხმად აფასებს. პარტიაში ამბობენ, რომ მსგავსი განცხადებებისგან გამოწვეული ზიანი ქვეყნის იმიჯის შელახვაზე უფრო დიდია. დროა მიიჩნევს, რომ ქვეყნის სუვერენიტეტის გადასარჩენად, სტრატეგიულ პარტნიორებთან კომუნიკაციის ინიციატივა ხელში პროდასავლურმა ოპოზიციამ უნდა აიღოს.

"მსგავსი რიტორიკა ძალიან ჰგავს რუსული სტილის "სუვერენული დემოკრატიის" მოდელს, რომელიც სახელმწიფოების მხრიდან ერთმანეთის შიდა საქმეებში ჩაურევლობის დამახინჯებულ გაგებას გულისხმობს და გზას უხსნის ავტორიტარიზმს. ამ განცხადებისა და დამოკიდებულების ზიანი იმაზე დიდია, ვიდრე მხოლოდ ქვეყნის იმიჯის შელახვა. მსოფლიოში სწორედ ახლა ყალიბდება რეალობა, რომელიც საქართველოს მომავალს მნიშვნელოვნად განსაზღვრავს", — აცხადებენ ისინი.

პარტიაში ამბობენ, რომ საქართველოსთვის ამერიკის შეერთებული შტატების მიერ 3 იანვარს გაკეთებული განცხადება განგაშის ზარი უნდა იყოს. მათი თქმით, აშშ-მ ღიად დააფიქსირა, რომ დემოკრატიაზე მსგავსი დარტყმები საქართველოს ნატოსა და ევროკავშირს აშორებს და რუსული საფრთხეების წინაშე დაუცველს ხდის.

"ამ ფონზე, ირაკლი კობახიძის მხრიდან სტრატეგიულ პარტნიორებზე თავდასხმა მიმდინარე გეოპოლიტიკური ტენდენციებისაგან ჩამოშორების გეგმაზომიერი ნაწილია. საქართველოს მომავლის განმსაზღვრელ შეხვედრებში მთავრობის წევრები არათუ არ მონაწილეობენ, არამედ ხშირად მიმდინარე გეოპოლიტიკური პროცესების შესახებ შესაბამისი უწყებები განცხადებებსაც კი არ ავრცელებენ", — ამბობენ ისინი.

3 იანვარს აშშ-ის საელჩომ საქართველოს ხელისუფლება ინსპექტორის სამსახურისა და საერთო სასამართლოების შესახებ კანონპროექტებში შეტანილი ცვლილებების გამო გააკრიტიკა. საელჩოს განცხადებით, ინსპექტორის სამსახურის გაუქმებით ქართულმა ოცნებამ მთავრობის ანგარიშვალდებულებას ძირი გამოუთხარა, ხოლო სასამართლოებზე მიღებული კანონპროექტით კიდევ უფრო შეასუსტა ნდობა სასამართლოს მიმართ.

მმართველი გუნდის თავმჯდომარე, ირაკლი კობახიძემ პასუხად განაცხადა, რომ ასეთი განცხადებები დასავლელი პარტნიორების მიმართ ქართული საზოგადოების ნდობას არყევს. მისი აზრით, განცხადებაში არაერთი უზუსტობა იყო და მთლიანობაში არასამართლიანია.

გაიგე მეტი: