ეროვნული ბანკის პრეზიდენტი, კობა გვენეტაძე იფლაციის შესახებ ფეისბუქ-პოსტს აქვეყნებს და წერს, რომ რიცხვების წვალებაა, თითქოს დეკემბერში წლიური ინფლაცია ბოლო 26 წლის რეკორდულ ნიშნულზე იყოს.

გვენეტაძის თქმით, სტატისტიკის ამგვარად წარმოდგენა შეცდომა, ან მოსახლეობის შეცდომაში შეყვანის მცდელობაა.

"ეს პოსტი ე.წ. "რიცხვების წვალებას", არასწორი ინფორმაციის გავრცელებასა და საზოგადოებრივი აზრის მანიპულირებას ეხება: თითქოს 2021 წლის დეკემბერში წლიური ინფლაცია ბოლო 26 წლის რეკორდულ ნიშნულზეა. ინფლაციის სტატისტიკის ასე წარმოდგენა, რბილად რომ ვთქვათ, შეცდომა ან, რაც გაცილებით უარესი — მოსახლეობის შეცდომაში შეგნებულად შეყვანის მცდელობაა. წლიური ინფლაციის განსაზღვრება არის მიმდინარე წლის რომელიმე თვეში ფასების დონის პროცენტული ცვლილება წინა წლის იმავე თვის ფასების დონესთან შედარებით.

მარტივად რომ ვთქვათ, წლიური ინფლაცია გვიჩვენებს, თუ რამდენად გაიზარდა ფასების საერთო დონე ბოლო ერთი წლის მანძილზე, მიუხედავად იმისა, თუ რომელ თვეში ვითვლით მას. ცნება "ზუსტად ერთი წლის წინ" არსებობს როგორც დეკემბერში, ისე მარტში ან ივლისში", — წერს გვენეტაძე.

სებ-ის პრეზიდენტი აღნიშნავს, რომ წლიურ ინფლაციას ეკონომისტები უყურებენ ყოველთვე და არა მხოლოდ დეკემბერში, რადგან მოსახლეობა სამომხმარებლო კალათაში შემავალ პროდუქტებს მხოლოდ დეკემბერში არ მოიხმარს. გვენეტაძე წერს, რომ ინფლაცია პანდემიასთან ერთად გლობალური გამოწვევაა.

რეალურად, დეკემბერში წლიური ინფლაცია 13,9% იყო, რაც ბოლო 10 წლის მაქსიმალური მაჩვენებელია. ამაზე მაღალი ინფლაცია ბოლოს 2011 წლის მაისში დაფიქსირდა, როდესაც წლიური ინფლაცია 14,3% იყო.

ინფლაციის მიზნობრივი მაჩვენებელი 3%-ია. ეროვნული ბანკი ინფლაციის დარეგულირებას მიმდინარე წლის გაზაფხულიდან ელოდება.

გაიგე მეტი: