პარლამენტში ადამიანის უფლებათა კომიტეტის თავმჯდომარე მიხეილ სარჯველაძე აცხადებს, რომ საქართველოში ამერიკის შეერთებული შტატების საელჩოს შეფასებები სახელმწიფო ინსპექტორის სამსახურის გაუქმებასთან დაკავშირებით არასწორია ხელისუფლებისთვის ის საყვედურები, რომელიც გამოითქვა დამსახურებული არ არის.

"არასწორია ის შეფასებები, რომლებიც გაკეთდა. არ მგონია, რომ დამსახურებული იყოს ის საყვედურები ხელისუფლებისთვის, რომლებიც გამოითქვა. [...] ჩვენი მიდგომა ასეთია. ხშირ შემთხვევაშია ხოლმე ჩვენი დაკვირვებით და შეფასებით, როდესაც არ ემთხვევა ერთმანეთს საზოგადოების პოზიციები და იგივე ზოგიერთი დიპლომატის, ან ზოგიერთი საერთაშორისო წარმომადგენლის მოსაზრებები და შეფასებები. ასეთ შემთხვევაში, ბუნებრივია, არ არის ეს კარგი ტენდენცია", — ამბობს ის.

3 იანვარს აშშ-ის საელჩომ საქართველოს ხელისუფლება ინსპექტორის სამსახურისა და საერთო სასამართლოების შესახებ კანონპროექტებში შეტანილი ცვლილებების გამო გააკრიტიკა. საელჩოს განცხადებით, გასულ კვირას ინსპექტორის სამსახურის გაუქმებით ქართულმა ოცნებამ მთავრობის ანგარიშვალდებულებას ძირი გამოუთხარა, ხოლო სასამართლოებზე მიღებული კანონპროექტით კიდევ უფრო შეასუსტა ნდობა სასამართლოს მიმართ.

ირაკლი კობახიძემ ამერიკის შეერთებული შტატების საელჩოს განცხადებასთან დაკავშირებით თქვა, რომ ასეთი განცხადებები დასავლელი პარტნიორების მიმართ ქართული საზოგადოების ნდობას არყევს. შინაარსთან დაკავშირებით ის ამბობს, რომ განცხადებაში არაერთი უზუსტობაა და მთლიანობაში არასამართლიანია.

ერთიანი ნაციონალური მოძრაობის თავმჯდომარის, ნიკა მელიას განცხადებით, ქართული ოცნების თავმჯდომარე ირაკლი კობახიძე დასავლელ პარტნიორებს აშანტაჟებს, რომ კრიტიკის შემთხვევაში ისინი საზოგადოების ნდობას დაკარგავენ და ქვეყნის პროდასავლური კურსი გადაიხედება. მელიას თქმით, მჭიდროდ ითანამშრომლებენ დასავლელ მეგობრებთან, რათა რეჟიმს სახელმწიფოს მიტაცების საშუალება არ მისცენ.