ნაციონალური მოძრაობის ერთ-ერთი ლიდერის, ხატია დეკანოიძის განცხადებით, თუ დაინახავენ, რომ ყოფილი პრეზიდენტის მიხეილ სააკაშვილის საქმეზე საგამოძიებო კომისიის შექმნა შესაძლებელია, პარლამენტში შევლენ.

"მე ვფიქრობ, მნიშვნელოვანია ამ კომისიის ამოქმედება. დიდი იმედი მაქვს, რომ ჩვენ ვიმსჯელებთ ამაზე, მე მქონდა კიდევაც ჩემს კოლეგებთან ოპოზიციიდან საუბარი. დიდი იმედი მაქვს, რომ 50 ხმა მოგროვდება ამასთან დაკავშირებით.

რა თქმა უნდა, იმ შემთხვევაში თუ ჩვენ, პრინციპში, ვხედავთ და დავინახეთ უკვე, რომ ასე ვთქვათ, ინსპექტორის სამსახურის ჩანაცვლება შესაძლებელია საგამოძიებო კომისიით, რა თქმა უნდა, ჩვენ შევალთ პარლამენტში და ეს იქნება ჩვენი, ასე ვთქვათ, ერთ-ერთი ყველაზე მნიშვნელოვანი საქმიანობა", — თქვა დეკანოიძემ.

მიხეილ სააკაშვილის ადვოკატმა, გიორგი მშვენიერაძემ დღეს, 3 იანვარს თქვა, რომ ექსპრეზიდენტს სურს მის მიმართ შესაძლო არაადამიანური და ღირსებისშემლახავი მოპყრობის საქმეზე პარლამენტში საგამოძიებო კომისია შეიქმნას. მისივე თქმით, სააკაშვილი მისი საქმის გამოძიებას უკავშირებს ინსპექტორის სამსახური გაუქმებას.

პარლამენტმა ქართული ოცნების ინიცირებულ კანონპროექტი სახელმწიფო ინსპექტორის სამსახურის გაუქმების შესახებ მესამე მოსმენით დაამტკიცა. კენჭისყრაზე 81 მომხრე და 7 წინააღმდეგი იყო.