დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, დღეს ომიკრონის 63 შემთხვევა გვაქვს, თუმცა მათგან მძიმე არცერთი არ არის და უმრავლესობა აცრილია. ამის შესახებ მან საკოორდინაციო საბჭოს წევრების სხდომის შემდეგ ისაუბრა.

"ჩვენ უკვე ვანგარიშობთ ყოველკვირეულ PCR დადებითებში რამდენი პროცენტი აქვს ომიკრონს და ეს, დაახლოებით, 1,1%-ის ფარგლებში მერყეობს, ცოტა ოდნავ კიდევ მეტი. მოგეხსენებათ, ყოველდღიურად ეს პროცენტი შეიცვლება, ომიკრონის გაორმაგების რეპლიკაციის პერიოდი ძალიან მოკლეა და სწრაფად ვრცელდება.

ვპროგნოზირებთ, რომ 2-3 კვირის ფარგლებში ის გარკვეულად, შესაძლებელია, დელტასთან მიმართებაში დომინანტი გახდეს. ამ 63-დან უმრავლესობა შემოტანილია და თითქმის ყველას კონტაქტის ჩაღრმავებული ეპიდკვლევა მიმდინარეობს — იქიდან მძიმე არცერთი არ გახლავთ, უმრავლესობა აცრილია, 6 ჰქონდა გადატანილი და იქიდან 18 წლამდე იყო 5 მოზარდი და ბავშვი", — აღნიშნა მან.