საქართველოს პარლამენტის წევრის, გრიგოლ ვაშაძის შეფასებით, შერიგება "სულელური" სიტყვაა და ის არ მოსწონს. ამის შესახებ კომენტარი მან პირველ არხთან გააკეთა.

"კატეგორიულად არ მომწონს ეს სულელური სიტყვა — შერიგება. გეგონება, ქვიშის ორმოში ბავშვები თამაშობდნენ, ფორმები ვერ გაიყვეს, დასცხეს ერთმანეთს და ახლა დედებმა უნდა შეარიგონ. რა შერიგება, რის შერიგება? მარტივია, უნდა დავიწყოთ ცხოვრება ჩვენი კონსტიტუციისა და კანონმდებლობის შესაბამისად და წერტილი", — თქვა ვაშაძემ.

10 დეკემბერს პრეზიდენტი სალომე ზურაბიშვილი აშშ-ის პრეზიდენტ ჯო ბაიდენის მიერ ორგანიზებულ დემოკრატიის სამიტზე საქართველოს სახელით წარსდგა და განაცხადა, რომ წამოიწყებს ინკლუზიურ პროცესს, საუბარს ეროვნული მასშტაბით, რომელშიც მთელი საზოგადოება იქნება ჩართული. ზურაბიშვილის თქმით, ამით მივაღწევთ უახლესი ისტორიის "საერთო აღქმას" და წავალთ წინ. პრეზიდენტის თქმით, საჭიროა ურთიერთპატივისცემაზე დაფუძნებულ საჯარო დისკურსი, წარსულზე საუბარი და იმის გააზრება რაც მოხდა.

6 დეკემბერს კი მიხეილ სააკაშვილმა განაცხადა, რომ ბრძოლა გამძაფრდება და არ გაჩერდება ქართული ოცნების დამარცხებამდე. ალტერნატივად სააკაშვილი მმართველ პარტიას "გონს მოსვლას" და ეროვნულ შერიგება შესთავაზა. მისი თქმით, "ეს ყველასთვის საუკეთესო გამოსავალია". მესამე პრეზიდენტს "დიდი შერიგების" იდეა მანამდეც არაერთხელ ჰქონია.

ამავე თემაზე: