დაავადებათა კონტროლის ეროვნული ცენტრის ხელმძღვანელი, ამირან გამყრელიძე იმედი ეთერში განმარტავს მისი და მისი თანამშრომლების ზაფხულის ქეიფს, რასაც მაშინ კრიტიკა მოჰყვა.

"ჩვეულებრივ ვაქცინაციის მარათონს ვატარებთ ჩვენ და სოფლებში ხშირად დავდივართ. მათ შორის ვიყავი ველისციხეში და იქ შემოდგომის პერიოდი იყო, როდესაც რთველი მთავრდებოდა, მოსახლეობასთან შეხვედრები გვქონდა და ახსნა-განმარტება ვაქცინაციაზე", — თქვა გამყრელიძემ.

ამის შემდეგ ის ამბობს, რომ ვენახში დაპატიჟეს და ცოტა ყურძენი დაკრიფეს.

"მერე ჩვენი საკუთარი შატო გვაქვსო გვითხრეს. მართლაც, ძველი შატო იყო, ძველი ქვევრებით, მე-19 საუკუნის და ცოტა წინ. იქ გვითხრეს, კახური შოთი და გუდის ყველი გავსინჯოთო, რაც არის კახურ ფურშეტს ვეძახი მე ამას. თანამშრომლები ერთად ვიყავი და არ ვუთხარით უარი, ჩვენ ყველანი აცრილები. შეიძლება ქართველს ქეიფი არ უყვარდეს? გააჩნია ვის წრეში. და ეგ იყო რა. სამწუხაროდ, მასპინძელმა შემდეგ სიტყვა გატეხა. მაშინ მთხოვეს მათ, მითხრეს, რომ ჩვენთან ტრადიციააო, თუ ცნობადი სახე მოდისო, ამას აკეთებსო. მე იქვე ვუთხარი, ერთი პირობით, თუ შეიძლება სურათი არ იყოს გადაღებული. შემპირდნენ რომ არაო და მერე", — თქვა NCDC-ის ხელმძღვანელმა.

სექტემბერის ბოლოს სტუდია მონიტორმა გაავრცელა ფოტოები, სადაც ჩანდა, დაავადებათა კონტროლის ეროვნული ცენტრის დირექტორი და თანამშრომლები როგორ ქეიფობენ რეგულაციების დარღვევით. ამის შემდეგ ამირან გამყრელიძე ირწმუნებოდა, რომ ქეიფისას რეგულაციები არ დაურღვევია.