ქართული ოცნების დეპუტატის, ნინო წილოსანის განცხადებით, ეკატერინე ტიკარაძემ, ალბათ არგუმენტები აწონა და წასვლის გადაწყვეტილება ასე მიიღო. ის არ აკონკრეტებს რა არგუმენტებს გულისხმობს და აღნიშნავს, რომ ჯანდაცვის ყოფილი მინისტრის უფლებაა, ამაზე თავად ისაუბროს.

"ალბათ, მან აწონა ყველა არგუმენტი და საბოლოოდ მიიღო ეს გადაწყვეტილება, პატივი ვცეთ მის გადაწყვეტილებას. ეს მისი უფლებაა ისაუბროს ამ არგუმენტაციაზე. ჩვენ, ალბათ, ამ საკითხზე მარჩიელობას უნდა დავანებოთ თავი. არანაირი ინფორმაცია დაპირისპირებასთან დაკავშირებით არ მაქვს", — აღნიშნა მან მთავარ არხთან.

ეკატერინე ტიკარაძემ ჯანდაცვის მინისტრის თანამდებობა 9 დეკემბერს დატოვა. ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ საქმიანობის პარტიის პოლიტსაბჭოში გაგრძელება მიიჩნია სწორად. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.

მანამდე მედიაში აქტიურად ვრცელდებოდა ინფორმაცია პრემიერმინისტრ ირაკლი ღარიბაშვილსა და ეკატერინე ტიკარაძეს შორის არსებულ დაპირისპირებაზე. გავრცელებული ინფორმაციის თანახმად, დაპირისპირება იყო ბოლო საკოორდინაციო სხდომაზეც, თუმცა მოგვიანებით, ეს დაავადებათა კონტროლის ეროვნული ცენტრის დირექტორმა, ამირან გამყრელიძემ უარყო.

აღსანიშნავია, რომ ტიკარაძე მწვანე პასპორტის უვადობას არ ემხრობოდა. როგორც მან 4 დეკემბერს განაცხადა, მიუხედავად იმისა, ჯანდაცვის სამინისტრო და დაავადებთა კონტროლის ცენტრი მთავარი უწყებები არიან ამ რეკომენდაციების გაცემის მხრივ, ვერ იტყვის, რომ "სრულად იზიარებენ ამ გადაწყვეტილებას". კოვიდგადატანილებისთვის მუდმივი პასპორტი პრემიერმინისტრის რეკომენდაცია იყო. 8 ნოემბერს ღარიბაშვილმა აღნიშნა, რომ არსებობდა მოსაზრება 6-თვიან ვადაზე, თუმცა საბოლოოდ საბჭომ უვადობაზე მიდი წინადადება გაიზიარა.