Robbie Williams-ის კონცერტმა დინამო არენაზე სრული ანშლაგით ჩაიარა. ბრიტანელმა მომღერალმა თავისი ცნობილი ჰიტები Let Me Entartain You, Feel, Angel, Rock DJ და სხვა სიმღერები შეასრულა.

როგორც თავად კონცერტის დასრულების შემდეგ აღნიშნა, გაოცებული იყო, რომ ქართველმა მსმენელმა მისი ყველა სიმღერის ტექსტი იცოდა:

"იმის გათვალისწინებით, რომ მე აქ არასდროს ვყოფილვარ, ჩემთვის ძნელად წარმოსადგენი იყო, რომ ჩემი სიმღერების ტექსტები ყველას ეცოდინებოდა. კონცერტის განმავლობაში არ ყოფილა არცერთი ჩავარდნა, მუდმივად იგრძნობოდა აუდიტორიის ენერგეტიკა. ეს იყო ჩემი პირველი კონცერტი ბოლო 7 თვის განმავლობაში და საკმაოდ ვნერვიულობდი, მაგრამ როგორც კი სცენაზე დავდექი, ქართველი მსმენელი ძალიან დამეხმარა. ეს იყო გამოცდილება, რომელიც ყოველთვის დარჩება ჩემს მეხსიერებაში. ძალიან ბედნიერი ვარ და მოუთმენლად ველოდები თქვენთან დაბრუნებას და კიდევ ერთხელ თქვენთან შეხვედრას“.

უილიამსი განსაკუთრებით გააოცა იმან, რომ ქართველმა მსმენელმა მისი სიმღერა Candy-ც კი ზეპირად იცოდა, რადგან არ ეგონა, საერთოდ ვინმემ თუ იცოდა ამ სიმღერის შესახებ.

კონცერტს ესწრებოდა როგორც ქართველი, ასევე უცხოელი მსმენელი. უილიამსის თაყვანისმცემლები განსაკუთრებული ოვაციებით მის მიერ შესრულებულ სიმღერას New York, New York შეხვდნენ, რადგან მომღერალმა ეს სიტყვები Georgia-თი ჩაანაცვლა და ისე იმღერა. ასევე განსაკუთრებული ოვაციები დაიმსახურა Queen-ის Bohemian Rhapsody-მ და We Will Rock You-მ.

ტრადიციულად, სიმღერა She is the One-ის შესრულების დროს უილიამსმა ერთ-ერთი მსმენელი გოგო შეარჩია, სცენაზე აიყვანა და მას უმღერა.

აღსანიშნავია ისიც, რომ უილიამსმა ერთ-ერთი სიმღერა მამასთან ერთად შეასრულა. დუეტი მსმენელისათვის სასიამოვნო მოულოდნელობა აღმოჩნდა.

როგორც ცნობილია, უილიამსი კონცერტამდე კულტურის მინისტრს, მიხეილ გიორგაძესაც შეხვდა და მისგან საჩუქრად ყაბალახი მიიღო. როგორც თავად მომღერალმა აღნიშნა, ძალიან მოეწონა საქართველო, ქართული სული, აქაური კლიმატი და კერძები.

რობი უილიამსის კონცერტი საქართველოში სამთავრობო პროექტ Check in Georgia-ს ფარგლებში გაიმართა. პროექტის ფარგლებში საქართველოს უკვე ეწვია ეროს რამაზოტი და რობი უილიამსი, სულ მალე კი ბათუმში Maroon 5-ის, ქუთაისში კი ხოსე კარერასის კონცერტები გაიმართება.

ღონისძიებები აპრილში დაიწყო და მთელი წლის განმავლობაში თბილისსა და ქვეყნის სხვადასხვა ქალაქში გაიმართება. პროექტი ასევე მოიცავს ქართველი და უცხოელი შემსრულებლების მონაწილეობით ქვეყნის 19 ქალაქში დაგეგმილ კონცერტებსა და 35 ფესტივალს - თეატრალური ფესტივალები, კინოფესტივალები, მუსიკალური ფესტივალები, ანიმაციური ფილმების ფესტივალები და სხვა.