პრეზიდენტის ადმინისტრაციასთან მიხეილ სააკაშვილის გათავისუფლების მოთხოვნით აქცია იმართება.

აქციის მონაწილეების განცხადებით, ქვეყნის პრეზიდენტს, სალომე ზურაბიშვილს აქვს ისტორიული შანსი იმისა, რომ დაპირისპირებული მოქალაქეები გააერთიანოს.

აქციის ორგანიზატორმა, ნანუკა ჟორჟოლიანმა ადგილზე მიხეილ სააკაშვილის მიმართვა წაიკითხა, სადაც მან საყოველთაო პოლიტიკურ ამნისტიაზე ისაუბრა.

"ჩვენ ამ შემთხვევაში მხოლოდ ცალკე აღებულ სიცოცხლეზე არ ვსაუბრობთ, რომელიც აქ დაბრუნებით პრაქტიკულად გადავდე ჩვენი ქვეყნისთვის, ჩვენ, ჩემი მოკრძალებული აზრით, უნდა ვისაუბროთ თავისუფლებაზე, თავისუფალ არჩევნებზე, თავისუფალ სასამართლოზე, თავისუფალ პროკურატურაზე, თავისუფალ მედიაზე და ზოგადად, ძალადობისგან თავისუფლებაზე. მე დარწმუნებული ვარ, რომ ეს ხუთი შეთავაზება შეთავსებადია ქვეყნის სწრაფ მოდერნიზაციასთან და ეკონომიკის განვითარებასთან, არამედ ხელს უწყობს მათ.

როგორ მივაღწიოთ ამ ყველაფერს — ჩვენ გვჭირდება, პირველ რიგში, საყოველთაო პოლიტიკური ამნისტია და მრგვალი მაგიდა ხელისუფლების გადანაწილებაზე და არჩევნებამდე მისვლაზე", — აღნიშნულია წერილში.

წერილით ექსპრეზიდენტი, ასევე, აცხადებს, რომ მას თანამდებობის სურვილი არ ამოძრავებს, უნდა მოვიდეს ლიდერების ახალი თაობა, თავად კი ლაზიკაში და განათლებაში ინვესტიციების მოზიდვით დაკავდება.

აქციის რამდენიმე მონაწილე, რომლებიც სალომე ზურაბიშვილთან პირადად შეხვედრას ითხოვენ, ნანუკა ჟორჟოლიანის განცხადებით, ისინი პრეზიდენტს ვადას 15:00 საათამდე აძლევენ, წინააღმდეგ შემთხვევაში სამომავლო სამოქმედო გეგმების შესახებ დაიწყებენ მსჯელობას.