ნაციონალური მოძრაობის წარმომადგენელმა სალომე სამადაშვილმა პარლამენტის სხდომაზე განაცხადა, რომ საქართველოში ყოველდღიურად ნიღბიანი ადამიანები წინა ხელისუფლების წევრებს და სხვა ადამიანებს თავს ესხმიან და ხელისუფლებას ადეკვატური პასუხი მოსთხოვა.

სამადაშვილმა აღნიშნული განცხადებისას გელა ხვედელიძის ცემის ინციდენტი გაიხსენა, რომელსაც თბილისში რამდენიმე დღის წინ სცემეს. მას სახის ძვლები ჰქონდა დამტვრეული.

სამადაშვილს გამოეხმაურა პატრიოტთა ალიანსის წევრი ადა მარშანია:

"ქალბატონ სამადაშვილს მინდა რეპლიკა ვესროლო, რასაც ჰქვია, ვიფიქრე ბევრი, თუმცა ბევრი ფიქრის დროც არ მქონდა, სამწუხაროდ, თქვენ ნაციონალურ მოძრაობას რატომღაც ოპოზიცია გქვიათ, ესაა დიდი უსამართლობა და ესაა დიდი დანაშაული".

მარშანიამ ასევე ფრაქციისთვის მიცემული 7 წუთის გადანაწილების პრინციპი გააპროტესტა:

"ფრაქციას მიეცა შვიდი წუთი პოლიტიკური განცხადებებისთვის, ეს ძალიან კარგია, მაგრამ ფრაქციის გადასაწყვეტი უნდა იყოს, ამ შვიდი წუთში ჩვენ როგორ გამოვდივართ სიტყვით, ერთი ადამიანი გამოვდივარ სიტყვით, ერთი ფალავანი გამოგვყავს ტატამზე თუ ექვსივე გავდივართ".