სირიელი აჯანყებულების მიერ კონტროლირებად ტერიტორიაზე, იდლიბის პროვინციაში, 4 აპრილს, სავარაუდოდ ქიმიური იარაღი გამოიყენეს. აჯანყებულები და დასავლური სახელმწიფოები მიიჩნევენ, რომ ბომბები მომწამლავი ნივთიერებებით, ასადის რეჟიმმა, ან მისმა მოკავშირეებმა ჩამოაგდეს.

სავარაუდოდ ქიმიური იარაღის გამოყენებას ემსხვერპლა ათეულობით ადამიანი, მათ შორის არიან ბავშვები. სხვადასხვა სოციალური ქსელით ვრცელდება მომწამლავი გაზის შედეგად გარდაცვლილთა და დაშავებულთა შოკისმომგვრელი ფოტო და ვიდეო მასალები.

ასადის ხელისუფლება ბრალდებებს უარყოფს და ამტკიცებს, რომ მსგავს იარაღს ის არ ფლობს. გაეროს უშიშროების საბჭო დღეს, 5 აპრილს, საფრანგეთისა და დიდი ბრიტანეთის მოთხოვნით იკრიბება. ამავე საბჭოს წევრი, რუსეთი, სარგებლობს ვეტოს უფლებით. გარდა ამისა, სწორედ რუსეთია ასადის რეჟიმის მოკავშირე, რომელიც პირდაპირ სამხედრო ძალითა და საჰაერო იერიშებით ეხმარება ასადს აჯანყებულების წინააღმდეგ საბრძოლველად.

BBC-ის ცნობით, მომხდარის შესახებ თავისი ვერსია გაავრცელა რუსეთმა. კერძოდ, რუსეთის თავდაცვის სამინისტროს ვერსიით, აჯანყებულების ტერიტორიის დაბომბვის შედეგად აფეთქდა მეამბოხეთა საწარმო, სადაც ქვეითთა ნაღმებს ამზადებდნენ და სწორედ ამან გამოიწვია მოწამვლა.

თუ სირიაში დადასტურდება ქიმიური იარაღის გამოყენება, ეს იქნება ერთ-ერთი ყველაზე მასშტაბური, მსგავსი დანაშაული, რომელიც ბოლო წლებში ჩაიდინეს მშვიდობიანი მოსახლეობის წინააღმდეგ.

სირიაში ომი უკვე ექვსი წელია მიმდინარეობს, რასაც, გასული წლის მონაცემებით 400 ათასი ადამიანი ემსხვერპლა, ხუთი მილიონი კი ლტოლვილად იქცა. თუმცა, მას შემდეგ მონაცემების დათვლა პრაქტიკულად შეუძლებელია, შესაბამისად, მსხვერპლი, შესაძლოა უფრო მეტი იყოს.