საქართველოს რესპუბლიკური პარტია მიიჩნევს, რომ ბოლოდ დროს სულ უფრო ინტენსიური ხდება პოლიციელების მიერ უფლებამოსილების გადამეტების ფაქტები, ხოლო გამოძიების დაწყება და კონკრეტული პირების მიმართ პასუხისმგებლობის დაყენება - არ ხდება. ამის შესახებ პარტიამ განცხადება დღეს, 3 აპრილს გაავრცელა:

"წინა კვირას საზოგადოებისთვის ცნობილი გახდა ნარკოტიკული საშუალების ფლობაზე (რასაც ბრალდებული სადავოდ ხდის) დაკავებული შოთა პაკელიანის პოლიციის განყოფილებაში სასტიკად ცემის ფაქტი, ასევე, თბილისში, ვაკეში ორსული ქალის გამოსარჩლებისათვის, ახალგაზრდა მამაკაცის ცემისა და დაკავების ფაქტი. ყველა მსგავს შემთხვევაში, შინაგან საქმეთა სამინისტრო ცდილობს მიჩქმალოს საკუთარი თანამშრომლების მხრიდან ჩადენილი ძალადობა."

რესპუბლიკური პარტია მიიჩნევს, ხელისუფლების ასეთი მიდგომა კიდევ უფრო დიდი დანაშაულია და ორიენტირებულია სამართალდამცავი სისტემის შიშსა და შანტაჟზე აგებული მმართველობის ჩამოყალიბებაზე:

"სამწუხაროა, რომ ხელისუფლებამ, ისევე, როგორც მისმა წინამორბედმა არ, ან ვერ გაიაზრა მსგავსი მიდგომის მძიმე შედეგები."

რესპუბლიკელები მოუწოდებენ სამართალდამცავ ორგანოებს, განსაკუთრებული ძალისხმევა მიმართონ გამოვლენილი კანონდარღვევების აღმოსაფხვრელად, რათა არსებული ტენდენციების შედეგად არ შეიქმნას სოციალურად ფეთქებადი გარემო.