აშშ-ს ყოფილი ელჩი საქართველოში, იან კელი ხელისუფლებას მოუწოდებს აიღოს პასუხისმგებლობა და ექსპრეზიდენტი მიხეილ სააკაშვილი სამოქალაქო კლინიკაში გადაიყვანოს. ეს განცხადება კელიმ ტვიტერის ოფიციალურ გვერდზე მას შემდეგ გააკეთა, რაც სააკაშვილმა საკუთარი ადვოკატების თვალწინ გონება დაკარგა.

"ბოლოს და ბოლოს გადაიყვანეთ წყეულ სამოქალაქო კლინიკაში. სააკაშვილმა თქვა, რომ შეწყვეტს შიმშილობას, თუკი გადაიყვანენ სამოქალაქო კლინიკაში. გაავლეთ ღობე პერიმეტრზე, თუკი არეულობაზე ღელავთ. უბრალოდ მოიქეცით პასუხისმგებლიანად და გააკეთეთ ეს", — წერს დიპლომატი.

18 ნოემბერს, ექსპრეზიდენტ მიხეილ სააკაშვილის ადვოკატმა, ბექა ბასილაიამ მე-18 დაწესებულებიდან გამოსვლის შემდეგ განაცხადა, რომ სააკაშვილი ოთახიდან გასვლისას "მოსხლეტით წაიქცა და გადააწვინეს საწოლზე", ამასთან მან თქვა, რომ ხელით გაუხსნეს თვალები. ამის შემდეგ პენიტენციურმა გაავრცელა განცხადება და თქვა, რომ სააკაშვილის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის". რეანიმატოლოგმა კი თქვა, რომ ექსპრეზიდენტი რეანიმაციაშია. მისივე თქმით, პაციენტმა მცირე ხნით გონება დაკარგა. ასევე, ჰქონდა მაღალი წნევა და ახლა "აბსოლუტურად სტაბილურ" მდგომარეობაშია.