ქართული ოცნების დეპუტატის, ბექა დავითულიანის განცხადებით, იმ შემთხვევაში თუ ექსპრეზიდენტის ჯანმრთელობის მდგომარეობა დამძიმდება, ამაზე პასუხისმგებელ პენიტენციური სამსახური და თავად სააკაშვილი იქნება.

"პასუხისმგებლობა არის ორი მიმართულებით, ერთი, ეს არის პენიტენციური სისტემა, რომელიც პასუხს აგებს პატიმრის ჯანმრთელობაზე და მეორე, ეს არის თავად პატიმარი, რომელიც იღებს თავად გადაწყვეტილებას და რისკის ქვეშ აყენებს თავის თავს. რა თქმა უნდა, პენიტენციური სისტემა ვალდებულია, პროტოკოლით და სტანდარტით გათვალისწინებული ყველა ღონისძიება გაატაროს იმისთვის, რომ პატიმრის ჯანმრთელობა საფრთხე არ დაემუქროს", — განაცხადა მან.

ცოტა ხნის წინ მიხეილ სააკაშვილის ადვოკატმა, ბექა ბასილაიამ გლდანის მე-18 სამედიცინო დაწესებულებასთან განაცხადა, რომ სააკაშვილი ოთახიდან გასვლისას "მოსხლეტით წაიქცა" და ის საკაცით გაიყვანეს. ამის შემდეგ პენიტენციურმა გაავრცელა განცხადება, რომ სააკაშვილის ჯანმრთელობის მდგომარეობა სტაბილურია და "ცოტა ხანში ექიმი რეანიმატოლოგი გააკეთებს კომენტარს მედიისთვის".

17 ნოემბერს, სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი წარადგინა. კონსილიუმი ციხის საავადმყოფოში იმავე დღეს შევიდა და ადგილზე მდგომარეობას 4 საათზე მეტი ხნის განმავლობაში შეისწავლიდა. მეორე დღეს მათ გამოაქვეყნეს დასკვნა, რომლის მიხედვითაც მიხეილ სააკაშვილის მდგომარეობა კრიტიკულია. ექიმების განცხადებით, მკურნალობის გაგრძელება რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში.

მიხეილ სააკაშვილი 49-ე დღეა შიმშილობს. სააკაშვილი, მისი ადვოკატები და არასამთავრობო ორგანიზაციის წარმომადგენლები მის სამოქალაქო კლინიკაში გადაყვანას ითხოვენ, თუმცა ხელისუფლება უარზეა. 8 ნოემბერს ექსპრეზიდენტი მისი და მისი ადვოკატების სურვილის საწინააღმდეგოდ, გლდანის ციხის სამკურნალო დაწესებულებაში ძალის გამოყენებით შეიყვანეს.

სტრასბურგის სასამართლოს გადაწყვეტილების შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

გაიგე მეტი: