ავატარის სერიალში, კიდევ სამი მნიშვნელოვანი პერსონაჟის შემსრულებელი მსახიობის ვინაობა ცოტა ხნის წინ გახდა ცნობილი.

ნეტფლიქსის სერიალში პოლ სან-ჰანგ ლი, რომელმაც The Mandalorian-შიც ითამაშა, ზუკოს ბიძისა და ცეცხლის ერის ყოფილი გენერლის, აიროს, როლს მოირგებს. აანგის აღმზრდელი ბერის, გიაცოს, როლს ლიმ ქეი სიუ შეასრულებს, ხოლო კიმ ლიანი ამბიციურ ადმირალ ჟაოს ითამაშებს.

ფოტო: Netflix

ამასთან, ჩვენ უკვე ვიცით მთავარი პერსონაჟების შემსრულებელი მსახიობების ვინაობაც. აანგს გორდონ კორმიე, კატარას — კიავენტიიო, სოკას — იენ ოუსლი, ხოლო — ზუკოს დალას ლიუ — განასახიერებენ.

ფოტო: Nickelodeon

სერიალზე მუშაობის დაწყების შესახებ ნეტფლიქსმა თავდაპირველად 2018 წელს განაცხადა. თუმცა, გასულ წელს კომპანიას ავატარის შემქმნელებთან, მაიკლ დანტე დიმარტინოსა და ბრაიან კონიეცკოსთან, "შემოქმედებითი ხედვების აცდენის" გამო უთანხმოება მოუხდა.

"მივხვდი, რომ სერიალის შემოქმედებითი მიმართულების მართვა არ შემეძლო, თუმცა, ამაზე პასუხის გაცემა ნამდვილად შეიძლებოდა", — განაცხადა მაშინ დიმარტინომ, — "ნეტფლიქსის სერიალს კარგი პროდუქტის პოტენციალი ნამდვილად აქვს, თუმცა, დარწმუნებით შემიძლია ვთქვა, რომ ეკრანზე რაც უნდა გამოვიდეს, ის არ იქნება, რის გაკეთებასაც მე და ბრაიანი ვაპირებდით".

ნაით შიამალანის 2010 წელს გამოსული ფილმის შემდეგ ეს ავატარის პირველი "ლაივ-ექშენ" ეკრანიზაციაა. ნეტფლიქსის პროექტის შემქმნელის, ალბერტ კიმის განცხადებით, ტექნოლოგიები იმ დონემდე განვითარდა, რომ სერიალს ახლა არა მხოლოდ ანიმაციაში შექმნილის ზუსტად გადმოცემა, არამედ სამყაროსათვის სხვა ხიბლის მიცემაც კი შეუძლია.

ჯერჯერობით უცნობია, როდის იხილავს მაყურებელი სერიალს.