ქართული ოცნების დეპუტატის, ალუდა ღუდუშაურის განცხადებით, ნაციონალური მოძრაობის საპროტესტო აქციის მონაწილეები გამზირებზე ლეიბებს თუ გაშლიან, რიცხობრივად უფრო მეტნი გამოჩნდებიან. ის ამტკიცებს, რომ პარტიას დღითიდღე აკლდება მხარდამჭერები და იქამდე მივიდნენ, რომ უკვე მანქანების აქციას აწყობენ.

"შეხედეთ, როდესაც საუბარი არის, რომ თურმე სიარულში მეტნი გამოჩნდებიან, არ ვიცი, დაწოლით მეტი გამოჩნდებაინ. გამზირებზე თუ, მაგალითად, ლეიბებს გაშლიან, უფრო ბევრნი გამოჩნდებიან და ხედავენ, რომ ძალიან კომიკური სახე ეძლევა ამ ყველაფერს და ადამიანები დღითიდღე უფრო აკლდებათ და ახლა მოინდომეს, რომ მანქანების აქციას აწყობენ. აი, სადამდე დავედით!" — განაცხადა ღუდუშაურმა პალიტრანიუსის ეთერში.

ნაციონალური მოძრაობის თავმჯდომარემ, ნიკა მელიამ საპროტესტო აქცია სამ ლოკაციაზე დააანონსა. მელიას თქმით, 16 ნოემბერს აქციები ავტოკოლონებით გაიმართება.

ექსპრეზიდენტ მიხეილ სააკაშვილის დაკავებისა და არჩევნების შედეგების გამოცხადების შემდეგ ოპოზიცია თითქმის ყოველდღიურ რეჟიმში აწყობს საპროტესტო აქციებს.

8 ნოემბერს სააკაშვილის მხარდასაჭერ აქციაზე ნიკა მელიამ უწყვეტი პროტესტი დააანონსა. მელიას თქმით, ყოველი დღის ბოლოს მომდევნო დღის გეგმების შესახებ გახდება ცნობილი და საზოგადოებას საპროტესტო აქციების ლოკაციებს შეატყობინებენ.