სახალხო დამცველის, ნინო ლომჯარიას განცხადებით, ბოლო 1 წელში მე-12 პენიტენციური დაწესებულებიდან მე-18 გლდანის სამკურნალო დაწესებულებაში არცერთი პატიმარი არ გადაუყვანიათ და ის, რომ მიხეილ სააკაშვილს ეპყრობიან ისე, როგორც სხვა პატიმრებს, სიმართლე არაა.

"ჩვენ რაც ვნახეთ ჩანაწერები, მე-12 დაწესებულებიდან მე-18 გლდანის სამკურნალო დაწესებულებაში ბოლო 1 წლის განმავლობაში გადაყვანილი არ არის არცერთი პატიმარი, ანუ როდესაც საუბარია იმაზე, რომ მიხეილ სააკაშვილს ეპყრობიან ისე, როგორც სხვა პატიმრებს, არ არის სიმართლე, პირიქით, შეიძლება ვთქვათ, რომ ეს არის განსხვავებული შემთხვევა, ჩვეულებრივი პრაქტიკისგან ამოვარდნილი განსხვავებული შემთხვევა, როდესაც მე-12 დაწესებულებიდან მე-18 დაწესებულებაში გადაიყვანეს პატიმარი მაშინ, როდესაც სხვები გადაჰყავთ ხოლმე სამოქალაქო ტიპის დაწესებულებაში, ამიტომ ესეც არის, რა თქმა უნდა, ნიშანდობლივი", — განაცხადა მან TV პირველის ეთერში.

11 ნოემბერს პენიტენციურმა სამსახურმა გაავრცელა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

ამ ვიდეოს გამოქვეყნდებიდან რამდენიმე საათში პენიტენციურმა სამსახურმა მეორე ვიდეო გამოაქვეყნა, სადაც მიხეილ სააკაშვილი უკვე გაჩერებულ სასწარაფო დახმარების მანქანაშია და ამბობს, რომ არ გადმოვა. ის რუსთავის ციხეში დაბრუნებას ითხოვს. უწყება აქამდე ამტკიცებდა, რომ სააკაშვილმა რუსთავის დაწესებულება თავისი ნებით დატოვა.