დროას ლიდერი, ელენე ხოშტარიას განცხადებით, ბოლო ანალიზით ერთ-ერთი მაჩვენებელი, რომელიც კრიტიკულ ზღვარზე იყო გამოსწორდა. მისი თქმით, ამის გამო ამ ეტაპზე გადასხმებს აჩერებს.

"თუ რამე "გაკრიტიკულდება" ექიმებთან ერთად მივიღებ გადაწყვეტილებას. დღე მეცხრეც მიილია და ვარ ძალიან მხნედ და შემართებით. თქვენც, ჩემო მეგობრებო, არ ინერვიულოთ", — წერს ის ფეისბუქგვერდზე.

11 ნოემბერს ხოშტარიამ განაცხადა, რომ რამდენიმე ანალიზში არის ცვლილება და მოითხოვდა სამედიცინო ჩარევას. ამიტომ მან გადასხმა გაიკეთა, თუმცა, უარი თქვა საკვები დანამატებისა და კალორიების მიღებაზე.

ამავე დღეს, მას შემდეგ, რაც ექსპრეზიდენტმა მოუწოდა, რომ შიმშილობა შეწყვიტოს, მან განაცხადა, რომ იქამდე არ შეწყვეტს, სანამ სააკაშვილს სამოქალაქო კლინიკაში არ გადაიყვანენ. ხოშტარიამ მადლობა გადაუხადა სააკაშვილს შეფასებისა და მოწოდებისთვის, თუმცა აღნიშნა, რომ გადაწყვეტილება არავის მითითებით არ მიუღია და კონკრეტული მოთხოვნა ჰქონდა, რომლის შესრულებასაც დაელოდება.