ნაციონალური მოძრაობის წევრის, თინა ბოკუჩავას განცხადებით, კომპიუტერული ტომოგრაფი, რომელიც გლდანის ციხეში ექსპრეზიდენტ სააკაშვილის გადაყვანის შემდეგ მიიტანეს, ისევ უფუნქციოა. მისივე თქმით, სააკაშვილის პალატაში მხოლოდ წნევის აპარატი დევს და ტომოგრაფი დენის წყაროშიც კი არაა შეერთებული.

"ის ახლა რეალურად არ იმყოფება სამედიცინო დაწესებულებაში და არანაირი სამედიცინო ტექნიკა მის სიახლოვეშ არ არის. ერთადერთი რამ, რაც არის მის ოთახში თუ პალატაში, არის წნევის აპარატი და შესაბამისად, მას უფრო მეტი წვდომა ექნებოდა სამედიცინო მომსახურებასა და ტექნიკაზე რუსთავის დაწესებულებაში, ვიდრე ამ დაწესებულებაში, რომელსაც ხელისუფლება საავადმყოფოს ეძახის. ის CT-ს მანქანა, რომელიც სატვირთო მანქანით მოიტანეს, ისევ ისე უფუნქციოდ დევს და დენის წყაროშიც არ არის შეერთებული", — განაცხადა მან.

8 ნოემბერს გლდანის პენიტენციური დაწესებულების კლინიკაში კომპიუტერული ტომოგრაფი რესპუბლიკური საავადმყოფოდან გადაიტანეს. პირადმა ექიმმა, ნიკოლოზ ყიფშიძემ თქვა, რომ კომპიუტერული ტომოგრაფიის დამონტაჟებასა და ამუშავებს დრო სჭირდება.

სამედიცინო სფეროს წარმომადგენლების განმარტებით, ამ ტექნიკის მონტაჟს სჭირდება: მაღალტექნოლოგიური განათლების მქონე ინჟინრები, სპეციალურად მოწყობილი ოთახი, კალიბრაცია, ინჟინრები, რომლებიც ჩამოყვებიან და უსაფრთხო გამოყენებას უზრუნველყოფენ და ლიცენზია სახელმწიფოსგან რადიოაციული თუ სხვა გამოსხივებების შესახებ, რაც ენმ-ს წევრის გიორგი ჩალაძის თქმით, გლდანის ციხის საავადმყოფიში არ არის.