ევროპული საქართველოს აქტივისტმა ბათუმში, სახელმწიფო უსაფრთხოების წინ საჯდომი დახატა. მისი თქმით, ეს "დიდი რუსეთის უკანალია", და ქართული ოცნების დამფუძნებელს, ბიძინა ივანიშვილს სურს, მოსახლეობა იქეთკენ წაიყვანოს.

მანვე შენობაზე გააკრა წარწერა "სახელმწიფო საარჩევნო ორგანიზაცია". როგორც აქტივისტი ამბობს, ამ ქვეყანაში თუ ვინმე ამხობს, აჯანყებს და ურევს სიტუაციას, ეს არის ივანიშვილის ხელისუფლება, სუს-ის მეშვეობით, რომელიც "კრიმინალებთან ერთად აყალბებს ჩვენი მოქალაქეების არჩევანს".

"აქ არის ის არჩევანი, რასაც გვაძლევს ბიძინა ივანიშვილი ამ ორგანოს [სუს-ის] მეშვეობით. ეს არის დიდი რუსეთის უკანალი, რომლისკენაც სურს, რომ ჩვენი მოსახლეობა გააქანოს და წაიყვანოს, მაგრამ აქეთ წავლენ თვითონ, ბიძინა ივანიშვილთან ერთად", — განაცხადა აქტვისტმა.

3 ნოემბერს სახელმწიფო უსაფრთხოების სამსახურმა განცხადება გაავრცელა, რომლითაც სოციალურ ქსელებში "რევოლუციურ მოწოდებებს" გამოეხმაურა და მოქალაქეები სასჯელზე გააფრთხილა.

სუს-ის მტკიცებით, ბოლო დროს სოციალურ ქსელებსა და მასობრივი ინფორმაციის საშუალებებში მოქალაქეები განზრახ თუ გაუცნობიერებლად პირდაპირ მოუწოდებენ თანამოაზრეებს "რევოლუციისა და ხელისუფლების დამხობისკენ, მათ შორის ძალადობრივი გზებით". ამის ფონზე უწყება აცხადებს, რომ სახელმწიფო ხელისუფლების დამხობისკენ, მსგავსი მოწოდების შემცველი მასალის გავრცელება, ამავე მიზნით შეიარაღებული მოწოდება სისხლის სამართლის დანაშაულია და ისჯება თავისუფლების აღკვეთით 3 წლამდე.

მას შემდეგ რაც სუს-მა სოციალურ ქსელში რევოლუციური განწყობების შესახებ განცხადება გაავრცელა, მოქალაქეები "რევოლუციას" პოსტავდნენ.