ქართული ოცნების აღამსრულებელი მდივნის, მამუკა მდინარაძის განცხადებით, მოშიმშილე ექსპრეზიდენტის, მიხეილ სააკაშვილის ჯანმრთელობის მდგომარეობის სანახავად 41-ე დღეც აღარ დასჭირდა, რადგან შიმშილობის 37-ე დღეს გაირკვა, რომ "შიმშილობაც მორიგი დადგმული ფეიკია".

"რამდენიმე დღის წინ ვთქვი, ორმოცდამეერთე დღეს ველოდები, როცა სააკაშვილი (ორმოცდღიანი "შიმშილობის" ფონზე) ისევ ჯანმრთელად იქნება და სასაცილო მდომარეობაში აღმოჩნდება-მეთქი. ეს ნათქვამიც გააყალბეს, სიკვდილს ელოდებიანო, მათი გონება სხვანაირად ვეღარ მუშაობს. ორმოცდამეერთე არა, მაგრამ ოცდამეჩვიდმეტე დღეს გაირკვა, რომ შიმშილობაც კი მორიგი დადგმული ფეიკია", — აცხადებს ის.

მდინარაძე საკუთარ პოსტში წერს იმასაც, რომ უმძიმესი სანახავია ლიდერის მიმართ ფანატიზმი, ლექსების მიძღვნა და ტირილნარევი ხმა.

"ტყუილებს და ბოროტებასაც თავი რომ დავანებოთ, უმძიმესი სანახავია და თანამედროვე სამყაროში მხოლოდ პუტინის და კიმ ჩენ ინის შემთხვევაში თუ გაახსენდება ვინმეს ლიდერის (თუ ბელადის) მიმართ ასეთი ფანატიზმი, ლექსების მიძღვნა, გაბზარული, ტირილნარევი ხმა თუ მონოლოგები და ათასი სხვა მესიანისტური დითირამბი", — წერს მდინარაძე ფეისბუქგვერდზე.

პირველ ნოემბერს მდინარაძემ მიხეილ სააკაშვილის შიმშილობასთან დაკავშირებით დასმულ კითხვაზე უპასუხა, რომ 41-ე დღეს ელოდებიან და დარწმუნებულია, ექსპრეზიდენტი ამ დროს ჯანსაღად იქნება. ამასთანავე, 3 ნოემბერს, მდინარაძემ განაცხადა, რომ თუ ადამიანი 40 დღე საჭმლის გარეშე გაძლევს, "ე.ი საქმე სხვა რაღაცაშია".

გუშინ, 5 ნოემბერს იუსტიციის მინისტრმა, რატი ბრეგაძემ განაცხადა, რომ ექსპრეზიდენტის მდგომარეობა სტაბილურია და გარკევული დროის შემდეგ მან ფაფები და წვენები მიიღო. მისი თქმით, ამასთან დაკავშირებით სადეპუტატო კითხვით ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, მიხეილ სარჯველაძემ მიმართა და სწორედ დეპუტატის კითხვის საფუძველზე გაასაჯაროვა ეს ინფორმაცია.

ამის პარალელურად, ექსპრეზიდენტის ადვოკატი, ნიკა გვარამიამ აცხადებს, რომ მიხეილ სააკაშვილის მდგომარეობა მძიმდება და მოსალოდნელია კოლაფსი. მისივე თქმით, ექსპრეზიდენტის ფსიქიკას და აზროვნებას უკვე ეტყობა სერიოზული კვალი.

სააკაშვილი უკვე 37-ე დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.