უკრაინის სახალხო დამცველი ლუდმილა დენისოვა საქართველოს ხელისუფლებას ექსპრეზიდენტ მიხეილ სააკაშვილის საქმესთან დაკავშირებით საერთაშორისო სამართლის დაცვისკენ მოუწოდებს, მათ შორის უთითებს ადამიანის უფლებათა და ძირითად თავისუფლებათა დაცვის კონვენციის მე-3 მუხლს, რომლის მიხედვითაც არავინ შეიძლება დაექვემდებაროს წამებას ან არაადამიანურ მოპყრობას, ან ისეთ ქმედებას, რომელიც ადამიანის ღირსებას ულახავს.

"სამწუხაროა, რომ საქართველოს მიერ ხელმოწერილი ადამიანის უფლებათა და ძირითად თავისუფლებათა დაცვის კონვენციის მიღებიდან 71 წლის იუბილეზე გრძელდება მოქალაქეების წამების გამოყენება ადეკვატური სამედიცინო დახმარების არგაწევით. მიხეილს დღეს სასწრაფოდ სჭირდება მსოფლიო საზოგადოების მხარდაჭერა. მივმართავ საქართველოს ხელისუფლებას, უკრაინის მოქალაქე მიხეილ სააკაშვილს სათანადო სამედიცინო დახმარება გაუწიონ", — ნათქვამია ომბუდსმენის განცხადებაში.

სააკაშვილი პირველ ოქტომბერს დააკავეს. ის ბრალს არ აღიარებს, ამიტომ საპატიმროში გადაყვანის შემდეგ შიმშილობა დაიწყო და უკვე 36 დღეა შიმშილობს. მისი პირადი ექიმი აცხადებს, რომ ექსპრეზიდენტს ექიმების მეთვალყურეობა სჭირდება და საჭიროა კლინიკაში გადაყვანა. პენიტენციური სამსახური სააკაშვილს მხოლოდ ციხის კლინიკაში გადაყვანას სთავაზობს, ის უარზეა.

პროტესტის ნიშნად სააკაშვილმა უარი თქვა ნებისმიერ სამედიცინო დახმარებასა და ტესტების გაკეთებაზე. თუმცა დღეს, 3 ნოემბერს მისმა ექიმმა განაცხადა, რომ ის თავს სუსტად გრძნობს და ანალიზების გაკეთებაზე დაითანხმეს.