ქართული ოცნების ერთ-ერთი ლიდერის, არჩილ თალაკვაძის განცხადებით, იმისთვის, რომ ექსპრეზიდენტმა, მიხეილ სააკაშვილმა კანონით დადგენილი სამედიცინო დახმარება დახმარება მიიღოს, დამატებით ვინმეს შიმშილობა საჭირო არ არის. ასე ის პარტია დროას ლიდერის, ელენე ხოშტარიას მიერ შიმშილობის დაწყებას გამოეხმაურა და მისი შეწყვეტა სთხოვა.

"ელენე ხოშტარია არის ოპოზიციის წარმომადგენელი. ის, რა თქმა უნდა, თვითონ ირჩევს, იშიმშილოს, თუ არ იშიმშილოს. მე მინდა, მას ვუთხრა ამ ეთერით, რომ იმისათვის, რომ მიხეილ სააკაშვილმა მიიღოს კანონით დადგენილი სამედიცინო დახმარება, რაც მოშიმშილე პატიმარს ეკუთვნის, არ არის საჭირო დამატებით ვინმეს შიმშილობა. ამიტომ ერთადერთი შემიძლია ვუთხრა კოლეგიალურად, რომ შეწყვიტოს შიმშილობა, გაუფრთხილდეს თავის ჯანმრთელობას", — განაცხადა თალაკვაძემ პალიტრანიუსის ეთერში.

ამავე ეთერში თალაკვაძემ სააკაშვილის შიმშილობაზეც ისაუბრა და თქვა, რომ "მისთვის და საზოგადოების უდიდესი ნაწილისთვის გაუგებარია, თუ რისთვის შიმშილობს ექსპრეზიდენტი".

"დღეს რისთვის შიმშილობს სააკაშვილი, მართალი გითხრათ, ჩემთვის და საზოგადოების უდიდესი ნაწილისთვის არის გაუგებარი. რას ითხოვს ეს ადამიანი, იქნებ, თქვენ მაინც მითხრათ, რომ ვიმსჯელოთ ამ თემაზე", — განაცხადა არჩილ თალაკვაძემ.

ჟურნალისტმა მას განუმარტა, რომ სააკაშვილი თავს პოლიტიკურ პატიმრად თვლის და სამართლიან სასამართლოს ითხოვს, რაზეც თალაკვაძემ უპასუხა, რომ მეგის ქარდავაც და მისი ბევრი თანაგუნდელიც თავს პოლიტიკურ პატიმრად მიიჩნევს.

როგორც მან აღნიშნა, ეს ადამიანები "კომპეტენტურმა და დამოუკიდებელმა სასამართლომ" გაასამართლა და მათივე სისტემაში მათი კანონებით გაცილებით დიდხანს მოუწევდათ მსჯავრის მოხდა.

"მოცემულობა და ფაქტი გახლავთ ის, რომ ეს ადამიანები კომპეტენტურმა და დამოუკიდებელმა სასამართლომ გაასამართლა კონკრეტული დანაშაულებისთვის და პირდაპირ გეტყვით, რომ მსჯავრი, რომელიც მათ მოიხადეს ან დღეს იხდიან, არის ბევრად ნაკლები იმასთან შედარებით, რაც მათივე კანონებით მათივე სისტემაში მოუწევდათ იქ რომ გაესამართლებინათ. ასე რომ, ვერ ვხვდები, რას ემსახურება, კიდევ ერთხელ, ეს შიმშილობა", — თქვა თალაკვაძემ.

23 ოქტომბერს მსგავსი განცხადება გააკეთა პრემიერმინისტრმა, ირაკლი ღარიბაშვილმაც. მისი თქმით, სააკაშვილს ჭამას არავინ უშლის და აინტერესებს, რატომ შიმშილობს ის.

ელენე ხოშტარიამ შიმშილობა 3 ნოემბერს დაიწყო. მისი თქმით, შიმშილობას არ შეწყვეტს მანამ, სანამ მესამე პრეზიდენტს, მიხეილ სააკაშვილს სამოქალაქო კლინიკაში არ გადაიყვანენ.

მიხეილ სააკაშვილი პენიტენციურ დაწესებულებაში უკვე 35 დღეა შიმშილობს. მან შიმშილობა დაკავების დღიდან გამოაცხადა. მას შემდეგ, რაც ექსპრეზიდენტმა შიმშილობა დაიწყო, ექიმები აღნიშნავენ, რომ მისი ჯანმრთელობის მდგომარეობა სუსტია. მხარდამჭერები და თანაგუნდელები სააკაშვილს შიმშილობის შეწყვეტისკენ მოუწოდებენ.