ნაციონალური მოძრაობის თავმჯდომარე და თბილისის მერობის კანდიდატი, ნიკა მელია ამბობს, რომ "ჰაერში გამარჯვების სურნელი ტრიალებს" და ქართულ ოცნებას მოუწოდებს, "არ ინერვიულონ, რადგან ასე მუშაობს დემოკრატია".

"ბევრჯერ ითქვა ამ დღეების განმავლობაში, ჰაერში მართლაც ტრიალებს გამარჯვების სურნელი. მე ვფიქრობ იმაზე, რასაც ახლა ვსაუბრობ, ბევრი ადამიანი დამეთანხმება. მსგავსი არაფერი არ შეიმჩნეოდა პირველ ტურში. მე მოვუწოდებ ქართულ ოცნებას, ნუ იდარდებენ, ნუ ინერვიულებენ, ასე მუშაობს დემოკრატია. მე მესმის, რომ მათ აქვთ გარკვეული შიშები ხელისუფლების დათმობის, მაგრამ ეს ადრე თუ გვიან უნდა მომხდარიყო. ეს ხდება დღეს, ეს ხდება თბილისში. ეს ყველაფერი იწყება თბილისიდან და თბილისში გამარჯვების შემდეგ ჩვენ შევქმნით პრეცედენტს, საქმით დავამტკიცებთ, რომ კოალიციური მმართველობა არის ერთადერთი სწორი ფორმა მმართველობის, რომელიც გადატანილი იქნება ცენტრალურ დონეზე", — განაცხადა მელიამ.

მისივე თქმით, დარწმუნებულია, რომ მეორე ტურში გამარჯვებას კოალიციური მმართველობა მოიპოვებს.

"დარწმუნებული ვარ ძალიან, რომ გამარჯვებას მოიპოვებს კოალიციური მმართველობა და ამის საფუძველს იძლევა უკვე წინასწარი მონაცემები, რომელიც არსებობს და გამოცხადება საარჩევნო უბნებზე 10:00 საათისთვის არის გაცილებით მაღალი, ვიდრე პირველ ტურში. თქვენ იცით, რომ ტრადიციულად, როგორც წესი მეორე ტურებში ყველგან, ყველა ქვეყანაში, მათ შორის, რა თქმა უნდა, საქართველოშიც გამოცხადება საარჩევნო უბნებზე ნაკლებია, ვიდრე მეორე ტურში, მაგრამ წელს არის გამონაკლისი.

რისი მოლოდინიც გვქონდა, ის ხდება. ეს ნიშნავს, რომ თბილისმა გაიღვიძა, ეს ნიშნავს, რომ თბილისი იღვიძებს და თბილისი არჩევანს აკეთებს მრავალფეროვნების სასარგებლოდ. სასიხარულოა, რომ არის უდიდესი ისტორიული შანსი, რომ ხვალ ჩვენ მივიღოთ სულ სხვა თბილისი, თითოეულმა ჩვენგანმა შევცვალოთ ყველაფერი უკეთესობისკენ, შევცვალოთ თბილისი უკეთესობისკენ, შევცვალოთ საქართველო უკეთესობისკენ და მრავალფეროვნება იქნება, არის საწინდარი, გარანტია იმისა, რომ ადამიანის უფლებების სტანდარტი იქნება დაცული", — განაცხადა მერობის კანდიდატმა.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.