ამერიკის შეერთებული შტატების ელჩი საქართველოში, კელი დეგნანი მიხეილ სააკაშვილის მდგომარეობასთან დაკავშირებით ამბობს, რომ ამ პროცესებს ყურადღებით აკვირდებიან, როგორც აქ, ასევე ვაშინგტონში.

"პირველ რიგში, გეტყვით, რომ რა თქმა უნდა, შეწუხებული ვართ პრეზიდენტის ჯანმრთელობის მდგომარეობით. ვაკვირდებით ყურადღებით პროცესებს, როგორც აქ, ასევე, ვაშინგტონში. რა თქმა უნდა, მნიშვნელოვანია მას ჰქონდეს შესაბამისი სამედიცინო ზრუნვა, სამედიცინო მომსახურება.

მე არ ვარ ექსპერტი ევროპულ სამართალში, შესაბამისად ამაზე კომენტარს ვერ გავაკეთებ, თუმცა ჩვენ კვლავ მოვუწოდებთ სახელმწიფოს, რომ უზრუნველყოს სამართლიანი და მიუკერძოებელი მოპყრობა პრეზიდენტის მიმართ საქართველოსა და საერთაშორისო კანონმდებლობის შესაბამისად. რა თქმა უნდა, რადგანაც პრეზიდენტი არის უკრაინის მოქალაქე, უკრაინის სახელმწიფოს დაინტერესება დიდია, რომ მისი მოქალაქე იყოს დაცული", — აცხადებს ელჩი.

საქართველოს მესამე პრეზიდენტი, მიხეილ სააკაშვილი დაკავებიდან, 30-ე დღეა შიმშილობს. გუშინ სააკაშვილმა განაცხადა, რომ იგი უარს ამბობს შიმშილობის შემამსუბუქებელ მკურნალობაზე. იუსტიციის მინისტრის მტკიცებით, სააკაშვილს მკურნალობაზე უარი არ უთქვამს იღებს ყველა იმ სითხეს, პრეპარატსა და აბს, რასაც იღებდა წინა დღეების განმავლობაში.

გაიგე მეტი: