საქართველოს ახალგაზრდა იურისტთა ასოციაციამ ადგილობრივი თითმმართველობის არჩევნების მეორე ტურის წინასაარჩევნო პერიოდში პოლიტიკური პარტიებისთვის წინასაარევნო კამპანიის წარმოებაში ხელშეშლის ორი შემთხვევა აღწერა. ორგანიზაციის შეფასებით, სააანგარიშო პერიოდში გამოვლინდა სააგიტაციო მასალის დაზიანების ფაქტები, რომელიც მიმართული იყო როგორც მმართველი პარტიის, ისე ოპოზიციის წინააღმდეგ.

ანგარიშში მოხვდა ნაციონალური მოძრაობის წევრის, ნიკა ბაჩილავას საქმე. მისი თქმით, 13 ოქტომბერს მარჯანიშვილის მოედანზე სამსახურიდან სახლში დაბრუნების დროს სამი ადამიანი დაესხა თავს და ხელკეტებით სცემა. მისივე განცხადებით, თავდამსხმელებს ეკეთათ ნიღბები და მიხეილ სააკაშვილს აგინებდნენ. მედიით გავრცელებული ინფორმაციის მიხედვით, დაზარალებულმა პოლიციაში დარეკა, თუმცა ის ადგილზე არ მისულა. ნიკა ბაჩილავა ამ ინციდენტს პოლიტიკური ნიშნით ანგარიშსწორებას უკავშირებს და მიიჩნევს, რომ თავდამსხმელები ქართულ ოცნებასთან აფილირებული პირები იყვნენ.

ანგარიშში საუბარია, ასევე, შემდეგ შემთხვევებზე:

  • 14 ოქტომბერს პარტია ევროპული საქართველოს რუსთავის ორგანიზაციის თავმჯდომარეს, ვახტანგ ქებაძეს თავს დაესხნენ. მისი თქმით, იგი მიხეილ სააკაშვილის მხარდამჭერ აქციაზე წასასვლელად ემზადებოდა, როდესაც 50-ზე მეტი ადამიანი გარს შემოეხვია, სამმა პირმა კი მას ფიზიკური შეურაცხყოფა მიაყენა;
  • ნაციონალური მოძრაობის რუსთავის მერობის კანდიდატის, დავით კირკიტაძის შტაბთან მის მომხრეებსა და ოპონენტებს შორის სიტყვიერი და ფიზიკური დაპირისპირება მოხდა. დაშავდა დავით კირკიტაძის შტაბის სამი წევრი, აქედან ერთი, შავლეგო მანდარია, რუსთავის საკრებულოს წევრი. შსს-მ გამოძიება ძალადობის მუხლით დაიწყო.

ამასთან, საია ამომრჩევლის სავარაუდო მოსყიდვის შესახებაც საუბრობს. 27 სექტემბერს გავრცელებული ინფორმაციით, ძიმითის, ასკანისა და ნაგომარის საარჩევნო ოლქში ქართული ოცნების მაჟორიტარი დეპუტატობის კანდიდატმა, ტიტე მგელაძემ სოფელ ძიმითის ერთ-ერთ უბანს წყლის ცისტერნები, სავარაუდოდ, საჩუქრად გადასცა.

საია აფასებს, ასევე, 14 ოქტომბრის აქციასთან დაკავშირებული შემთხვევას, როცა თბილისში ნაციონალური მოძრაობის მიერ დაგეგმილ აქციაზე რეგიონებიდან მომავალ ავტოკოლონებს არაერთ ლოკაციაზე მოწინააღმდეგეები დახვდნენ. კადრებში ჩანს, როგორ აგინებენ ისინი ავტომანქანებში მსხდომ პირებს, ესვრიან ცოცხებსა და დროშის ტარებს. ამ ქმედებებში არასამთავრობო ორგანიზაცია წვრილმანი ხულიგნობის ნიშნებს ხედავს.

პირველი ტურის წინასაარჩევნო პერიოდში დაფიქსირდა ამომრჩევლის სავარაუდო მოსყიდვისა და მოქალაქეთათვის არჩევნებში ნების გამოვლენისათვის სავარაუდო ხელშეშლის ფაქტებიც. საიას შეფასებით, სავარაუდოდ პოლიტიკურად მოტივირებული ძალადობრივი ქმედებები კვლავ გამოწვევად რჩება, როგორც ორ ოქტომბრამდე, ასევე შემდეგაც. მათ შორისაა, სხვისი ნივთის დაზიანებისა და ფიზიკური თავდასხმის შემთხვევები. საია მოუწოდებს სამართალდამცავ ორგანოებს, აღნიშნული შემთხვევები მაქსიმალურად მოკლე ვადებში გამოიძიონ.