თბილისის მერობის კანდიდატი, ნიკა მელია სამწუხაროს უწოდებს იმ ფაქტს, რომ მისმა კონკურენტმა, კახა კალაძემ დებატზე უარი უთხრა. მისი თქმით, "მტრობის სპირალში შესულ კორუმპირებულ ჩინოვნიკებს ვერ გადაარწმუნებს". მელიამ, ასევე თქვა, რომ ოპონენტის ოჯახისთვის შეურაცხყოფა არასდროს მიუყენებია.

"რაც შეეხება მის მიერ, მერიაში კორუფციის ყოველდღიურობად ქცევას, მილიონების ჩაჯიბვას ატკატებად, მილიონების ხარჯვას მმართველ პარტიაზე, ძალადობრივი ჯგუფების დაფინანსებას და კრიმინალთან გარიგებას — ეს პერსონალური საკითხები არაა. ეს თბილისის პრობლემებია, რომელიც დასრულდება, მისი დამარცხებისთანავე. ვიცი, რომ პასუხები არა აქვს, არც პოზიტიური დღის წესრიგი გააჩნია — დაპირისპირების და სამოქალაქო კონფლიქტის რიტორიკას იყენებს პარტიის ბოსების მითითებით.

არადა თბილისელებისთვისაც და ჩვენი საერთაშორისო მეგობრებისთვისაც საინტერესო იქნებოდა საგნობრივი დებატები. რას იზამ — მტრობის სპირალში შესულ კორუმპირებულ ჩინოვნიკებს ვერ გადავარწმუნებთ — ისინი უნდა დავამარცხოთ! ყველამ ერთად 30-ში", წერს მელია Facebook გვერდზე.

დღეს, 19 ოქტომბერს მელიამ კალაძეს ღია დებატები შესთავაზა. მისი თქმით, ნაცვლად იმისა, რომ თბილისის პრობლემებზე ისაუბროს, კალაძე "ზიზღის კამპანიაში გადაეშვა". აღსანიშნავია, რომ იგივე პრეტენზია ჰქონდა კალაძეს მისი კონკურენტების, მათ შორის, ნიკა მელიას მიმართაც და ამბობდა, რომ წინასაარჩევნო პროგრამის ნაცვლად ის რეფერენდუმზე საუბრობდა.

კახა კალაძემ ამ შეთავაზებას პოპულიზმი უწოდა. მისი თქმით, მელია მთელი წინასაარჩევნო კამპანიის განმავლობაში მისი და მისი ოჯახის ლანძღვით იყო დაკავებული და არანაირი პროგრამა არ წარმოუდგენია.