საქართველოს პარლამენტის თავმჯდომარეს, კახა კუჭავას, არჩევნების დღეს საარჩევნო უბანზე ქართული ოცნების სიმბოლიკით მისვლის გამო, სასამართლომ სიტყვიერი შენიშვნა გამოუცხადა. აღნიშნული ინფორმაცია On.ge-ს სასამართლოში დაუდასტურეს.

საქართველოს ახალგაზრდა იურისტთა ასოციაციის სამართლებრივი დახმარების პროგრამის დირექტორი, ნონა ქურდოვანიძე აღნიშნულზე ამბობს, რომ პარლამენტის თავმჯდომარის ქმედება უბანზე აგიტაციას წარმოადგენს და ისჯება 2 000-ლარიანი ჯარიმით.

"კახა კუჭავა არჩევნების დღეს უბანზე ქართული ოცნების სიმბოლიკიანი პირბადით გამოცხადდა და კანონი დაარღვია. მისი ქმედება უბანზე აგიტაციას წარმოადგენს და ისჯება 2000-ლარიანი ჯარიმით. ეს იმდენად ცალსახა დარღვევა იყო, რამდენიმე დღის წინ საიას წარდგენილ საჩივარზე მსჯელობისას, ცესკომ კუჭავას წინააღმდეგ სამართალდარღვევის ოქმი შეადგინა. სხვა რეაგირებას არც ველოდით. დღეს სასამართლომ ამ ოქმთან დაკავშირებით იმსჯელა და სრულიად "მოულოდნელად", კუჭავას ქმედება მცირე მნიშვნელობის გადაცდომად შეაფასა და ჯარიმის ნაცვლად, სიტყვიერი შენიშვნა გამოუცხადა", — წერს ის ფეისბუქგვერდზე.

2 ოქტომბერს, კახა კუჭავა საარჩევნო უბანზე პარტიული სიმბოლიკით — 41-ნომრიანი პირბადით მივიდა. გარდა ამისა, მან თქვა, რომ ხმა კახა კალაძესა და ქართულ ოცნებას მისცა. ორივე ეს ქმედება კანონდარღვევაა, კერძოდ, საარჩევნო კოდექსის 45-ე მუხლის 11-ე პუნქტის და 2 000-ლარიან სანქციას ითვალისწინებს. მოგვიანებით კახა კუჭავამ აღიარა, რომ საარჩევნო უბანზე პარტიული სიმბოლიკით მისვლით კანონი დაარღვია. მისი თქმით, ეს შემთხვევითობა იყო.