ექსპრეზიდენტი გიორგი მარგველაშვილი აცხადებს, რომ არჩევნების მეორე ტურში ხმას ნიკა მელიას მისცემს და არა მის ყოფილ თანაგუნდელს, კახა კალაძეს. მარგველაშვილის თქმით, მისთვის რთულია იმ პოლიტიკური პარტიის მხარდაჭერა, ვისაც წლებია ებრძვის, მაგრამ ხმას აძლევს არა პოლიტიკურ ძალას, არამედ ოპოზიციას.

"მაქვს კონკრეტული არჩევანი — კალაძე და მელია. რა გავაკეთო? უარი ვთქვა ჩემს მოქალაქეობრივ ვალდებულებაზე და არ მივიდე არჩევნებზე, მივიდე გაბრაზებული და ბიულეტენი დავხიო ან შიგნით რამე სასაცილო დავწერო იმ იმედით, რომ მეორე დღეს მედიაში აჩვენებენ ამ ბიულეტენს, თუ მივიდე და გავაკეთო არჩევანი? მინდა კიდევ ერთხელ ამ სავარჯიშოზე ვისაუბრო. მე შემოვხაზავ ოპოზიციას. რთულია ჩემთვის ჩემი ბიოგრაფიით შემოვხაზო ის პოლიტიკური ძალა, რომელთანაც დაპირისპირებული ვარ 2003 წლიდან, მაგრამ მე იმ პოლიტიკურ ძალას არ ვხაზავ, მე ვხაზავ ოპოზიციას", — განაცხადა მან ფორმულას ეთერში.

მანვე აღნიშნა, რომ ახლა ოპოზიციამ უნდა იმოქმედოს პრინციპით "დღეს ერთად, ხვალ ცალ-ცალკე". მისი თქმით, სხვანაირად ვერ შეიცვლება არსებული რეალობა.

"მე შემოვხაზავ ოპოზიციას, იმიტომ, რომ მე ვიცი, რომ დღევანდელ რეალობაში იმ მითვისებას, იმ ქურდობას, იმ თაღლითობას, იმ აბსოლუტურად თავზეხელაღებულ გარყვნილებას, რომელიც ტრიალებს ხელისუფლებაში და რომელსაც აღარავინ აჩერებს, პირიქით, ჩემი შთაბეჭდილებით უბიძგებენ კიდევაც, მიდით, ჭამეთ რამდენიც შეგიძლიათ ეს ხალხის ფული, რამდენიც შეგიძლიათ, ამას ვერ გავაჩერებ მე, თუ არ გავაძლიერე ოპოზიცია", — აცხადებს ის.

თბილისის მერის არჩევნების მეორე ტურში ქართული ოცნების კანდიდატი და ყოფილი მერი კახა კალაძე და ნაციონალური მოძრაობის კანდიდატი ნიკა მელია გადავიდნენ. ცესკოს მონაცემებით, კალაძეს ხმების 45,04%, მელიას კი 33,96% აქვს.