გირჩი — მეტი თავისუფლება მეორე ტურში ყველა ოპოზიციურ კანდიდატს დაუჭერს მხარს. პარტიის წევრის, ბადრი გრიგალაშვილის განცხადებით, ისინი დროასთან, ევროპულ საქართველოსთან და სხვა პარტიებთან თანამშრომლობით, ყველა ხმის დაცვას შეეცდებიან.

"სრულად ვკონცენტრირდებით მეორე ტურზე, სადაც ყველა ოპოზიციურ კანდიდატს დავუჭერთ მხარს, მათ შორის, გირჩი — მეტი თავისუფლებიდან ბორის "ჩელე" ყურუა იქნება საბურთალოს მაჟორიტარობის კანდიდატი", — თქვა ბადრი გრიგალაშვილმა.

გრიგალაშვილის განცხადებით, 2 ოქტომბერს ჩატარებული არჩევნები ვერ ჩაითვლება სამართლიანად.

"გირჩი — მეტი თავისუფლება დროასთან, ევროპულ საქართველოსთან და სხვა პარტიებთან თანამშრომლობით, ვეცდებით თითოეული ხმა დავიცვათ. ვნახოთ თითოეული შესწორებული ოქმი, გასაჩივრებული ბიულეტენები გადავთვალოთ და გავიგოთ, რა არის ამის რეალური შედეგი, ჩვენ ამ ბრძოლას ბოლომდე გავყვებით.

ამის გარდა მნიშვნელოვანია ის ფაქტი, რომ ყველაფრის მიუხედავად, მიუხედავად იმისა, რომ დიდი ადმინისტრაციული რესურსი გამოიყენა ქართულმა ოცნებამ, გამოიყენა ძველი ბიჭების ინსტიტუტი, გამოიყენა საპატრიარქო, ამის მიუხედავად, მაინც გაიმართება მეორე ტურები და ოპოზიციამ მაინც მოახერხა დიდ ქალაქებში გამარჯვება", — ამბობს გრიგალაშვილი.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა, ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.