ამერიკის შეერთებული შტატების ყოფილმა ელჩმა საქართველოში, იან კელიმ გადააზიარა ტვიტი, რომელშიც სააკაშვილსა და ღარიბაშვილზეა საუბარი და დააწერა, რომ "ორივე მათგანი საწამლავია". კელიმ ისინი იმ პოლიტიკოსებს შეადარა, ვინც ირჩევს ძალაუფლებას და კონფლიქტს, ეროვნული ინტერესების ნაცვლად.

კერძოდ, კელიმ რეტვიტი გაუკეთა ნიუსს, რომელშიც ღარიბაშვილი ამბობდა, რომ სააკაშვილი "რევოლუციურ განზრახვას" ვერ განახორციელებდა, რადგან პოლიცია მის დაორგანიზებულ 5 000 პირს წყლის ჭავლით და მხუთავი აირით დაშლიდა.

"ორივე საზოგადოების საწამლავია როგორც ყველა პოლიტიკოსი, მათ შორის ჩემს ქვეყანაში, ვინც კონფლიქტსა და პიროვნულ ძალაუფლებას ეროვნულ ინტერესებზე მაღლა აყენებს", — დაწერა მან ტვიტერზე.

6 ოქტომბერს პრემიერმინისტრმა ექსპრეზიდენტზე ვრცელი ფეისბუქპოსტი გამოაქვეყნა, რომელშიც ავითარებს სხვადასხვა აზრს, განიხილავს ჭორს და თეორიას იმაზე, თუ რატომ ჩამოვიდა ის ქვეყანაში. ვერსიებს შორის პრემიერს ნარკოტიკებზე დამოკიდებულება და სახელმწიფო გადატრიალებაც აქვს ისე, რომ ბრალდებების გასამყარებლად არა ფაქტები, არამედ მოსაზრებები მოჰყავს. ის დამამცირებელ კონტექსტში საუბრობს იმაზე, თითქოს "სააკაშვილის ფსიქოლოგიური და ფსიქიკური მდგომარეობა ციხეში შესვლამდე და შესვლის შემდეგ რადიკალურად შეიცვალა". უცნობია, რას ეყრდნობა ღარიბაშვილი, თუმცა ფსიქიკურ ჯანმრთელობაზე ირონიულად საუბარი აძლიერებს სტიგმას და დისკრიმინაციულია. პრემიერმინისტრის მსგავსად, ამ საკითხზე დამცინავ კომენტარებს აკეთებენ ქართული ოცნების სხვა ლიდერებიც.