ქართული ოცნების ერთ-ერთი ლიდერის, მამუკა მდინარაძის განცხადებით, არჩევნების მეორე ტურის ჩატარების ალბათობა არც თუ ცოტა რაიონშია. მისი თქმით, მეორე ტური, შესაძლოა, ჩატარდეს 10-ზე მეტ რაიონში.

"არც თუ ცოტა რაიონში იქნება მეორე ტური, ეს არ იქნება ნახევარი რაიონების, მაგრამ შესაძლებელია იყოს 10-15, მე ზუსტი მონაცემი არ ვიცი, მაგრამ ეს არ იქნება 2 და 3 და არც, ვთქვათ 30, პირობითად. მაგრამ, იქნება ნამდვილად რაიონები, აქვე გიდასტურებთ და გამოვრიცხავ თქვენს ეჭვს და ოპოზიციის ეჭვსაც საბოლოოდ, რომ ვიღაცა რაღაცას ძალით არ ამბობდეს და არასწორ ინფორმაციას არ აწვდიდეს საზოგადოებას. აქვე გიდასტურებთ, რომ რამდენიმე და არაერთი მეორე ტური იქნება, რაც ჩვენს მონაცემებში ჩანს. შეიძლება ეს 10-ზე მეტიც კი იყოს, მაგრამ ეს არ იქნება, ჩემი აზრით, რა მონაცემიც ახლა გვაქვს 20-ზე მეტი", — აღნიშნა მდინარაძემ.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის (მხოლოდ თბილისი) თანახმად, მმართველ გუნდის შედეგი 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.