ქართული ოცნების თავმჯდომარე, ირაკლი კობახიძე მეორე ტურის ჩატარებას არ გამორიცხავს. მისი თქმით, ეგზიტპოლის ცდომილებიდან გამომდინარე, მეურე ტურის დანიშვნა შესაძლებელია. ის აღნიშნავს იმასაც, რომ მათი მოლოდინით ტელეკომპანია იმედისა და GORBI-ის მიერ გამოცხადებული ეგზიტპოლის შედეგები გამართლდება.

"რაც შეეხება მეორე ტურის საკითხს, როგორც მოგეხსენებათ, ცდომილება ეგზიტპოლის არის დაახლოებით 3%, აქედან გამომდინარე, ჩვენ უნდა დაველოდოთ, რა თქმა უნდა, ხმების დათვლას. შესაძლებელია ასეც და ისეც", — აცხადებს კობახიძე.

დღეს, 20:00 საათის შემდეგ სამი სხვადასხვა ეგზიტპოლის შედეგები გამოქვეყნდა, რომლებიც ერთმანეთისგან განსხვავებულ მონაცემებს აჩვენებს. კერძოდ, Edison Research და IPSOS ამბობს, რომ თბილისში მეორე ტური იქნება, ხოლო GORBI-ის ეგზიტპოლის მიხედვით კახა კალაძეს 51,3%-იანი მხარდაჭერა აქვს. რაც შეეხება პარტიულ რეიტინგებს, Edison Research-ის მიხედვით, ქართული ოცნება 43%-იან ბარიერს ლახავს და 46% აქვს, ხოლო IPSOS-ის (მხოლოდ თბილისი) თანახმად, მმართველ გუნდის შედეგი 38%-ია, GORBI კი ამბობს, რომ ქართულ ოცნებას 47,6%-იანი მხარდაჭერა აქვს.