ქართული ოცნების აღმასრულებელი მდივანი მამუკა მდინარაძე საარჩევნო უბნებთან ამომრჩევლის სავარაუდო მოსყიდვების ფაქტებზე ირწმუნება, რომ ერთ შემთხვევაში ქმარმა ცოლს გადააწოდა თანხა, მეორე შემთხვევაში ცოლმა — ქმარს.

"ვნახეთ ფაქტი, სადაც დაფიქსირდა ხელიდან ხელში თანხის გადაცემის ფაქტი. ერთ შემთხვევაში ქმარმა ცოლს გადააწოდა თანხა, მეორე, ბათუმის შემთხვევაში პირიქით იყო, ცოლმა ქმარს გადააწოდა თანხა. შეუძლიათ თქვენს კოლეგებს, ადგილზე ვინც არიან მოიძიონ მათი ნათესაური კავშირები, რომ ნამდვილად ცოლ-ქმარნი არიან", — განაცხადა მდინარაძემ.

საარჩევნო უბნებზე დაფიქსირებულ დარღვევებზე გავრცელებულ ინფორმაციას გამოეხმაურა ქართული ოცნების საზოგადოებასთან ურთიერთობის სამსახურის მდივანი შალვა პაპუაშვილიც.

დღის განმავლობაში არასამთავრობო ორგანიზაციებისგან საარჩევნო პროცესისას უბნებზე დაფიქსირებულ დარღვევებზე ცნობები ვრცელდება.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.

გაიგე მეტი: