პრემიერმინისტრმა, ირაკლი ღარიბაშვილმა განაცხადა, რომ ნაციონალურმა მოძრაობამ მიიღო ის რაც უნდოდა — რეფერენდუმი. ღარიბაშვილი ამბობს, რომ ამ "რეფერენდუმის" შედეგად საზოგადოება ენმ-ს პოლიტიკურ განაჩენს გამოუტანს.

"ნაციონალურ მოძრაობას უნდოდა რეფერენდუმი და მიიღო კიდევ რეფერენდუმი — ეს დღე გახდა რეფერენდუმი ნაციონალური მოძრაობისთვის, რომელსაც ქართული საზოგადოება დღეს თავის პოლიტიკურ განაჩენს გამოუტანს საბოლოოდ", — განაცხადა ირაკლი ღარიბაშვილმა.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.