ექსპრეზიდენტის, გიორგი მარგველაშვილის განცხადებით, მან ხმა ოპოზიციურ ძალებს მისცა. ამის შესახებ მარგველაშვილმა საარჩევნო უბანზე ჟურნალისტებთან ისაუბრა.

"მე მივიღე მონაწილეობა რეფერენდუმში. რეფერენდუმში, რომელიც ეხებოდა საქართველოს დემოკრატიულ მომავალს და მივეცი ხმა იმას, რომ დამთავრდეს სიღარიბის, უიმედობის და შანტაჟით მართვის ჭაობი და ცოტა მაინც სუფთა წყალი შემოვიდეს აი, ამ სისტემაში. ამას მივეცი ხმა, ეს ნიშნავს, რომ მე მივეცი ხმა ოპოზიციურ ძალებს", — თქვა მან.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.