საქართველოში არჩევნებზე დაკვირვების მიზნით ჩამოსული ევროპარლამენტარები აცხადებენ, რომ პროცესი სათანადოდ მიმდინარეობს, მაგრამ დაფიქსირდა ტექნიკური პრობლემებიც.

"ჩვენ ამ დილით რამდენიმე საარჩევნო ოლქში არჩევნების პროცესის დაწყებას დავაკვირდით. პროცესი მშვიდად დაიწყო, ოლქები დროულად გაიხსნა, საარჩევნო მასალა ადგილზე იყო, თანამშრომლებიც გამოცხადნენ. ამგვარად, ამ ეტაპისთვის შეგვიძლია ვთქვათ, რომ პროცესი სათანადოდ მიმდინარებს. იყო გარკვეული ტექნიკური პრობლემები. მაგალითად, მეორე სართული შეზღუდული შესაძლებლობების მქონე პირებისთვის რთულადაა მისაწვდომი. ხოლო ერთ საარჩევნო ოლქში ელექტრონული დათვლის აპარატი გაფუჭდა, ამიტომ ის ჩვეულებრივ საარჩევნო ურნად იქცა. ამის გარდა თბილისში პროცესი მშვიდად მიმდინარეობს", — განაცხადა მაიკლ გალერმა, ევროპარლამენტის დელეგაციის თავმჯდომარემ.

ჟურნალისტების კითხვაზე, რა კომენტარს გააკეთებდა მიხეილ სააკაშვილის დაკავებასთან დაკავშირებით, გალერმა აღნიშნა, რომ ეს მოვლენები მათ სადამკვირვებლო მისიის ჩარჩოებს ცდება.

"ეს ის მოვლენაა, რომელიც არჩევნების პროცესზე ზეგავლენას არ მოახდენს, ამიტომ ჩვენი როლის გათვალისწინებით, კომენტარი არ გვაქვს".

ევროპარლამენტარის, მარკეტა გრეგოროვას განცხადებით, მათ ოთხი ადგილი მოინახულეს და აპირებენ კიდევ ბევრს ეწვიონ.

"ჩვენ ვაკვირდებით საარჩევნო პროცესს და ვავსებთ ფორმებს იმაზე, არის თუ არა ყველაფერი წესრიგში — რამდენადაა დაცული პანდემიასთან დაკავშირებული სიფრთხილის ზომები და, რა თქმა უნდა, რამდენად სამართლიანად მიმდინარეობს არჩევნების პროცესი", — თქვა მან.

შეკითხვაზე, თუ რა გავლენა ექნება მიხეილ სააკაშვილთან დაკავშირებულ მოვლენებს ქვეყანაზე, გრეგოროვა პასუხობს, რომ ეს მომავალში გამოჩნდება.

"ჯერ კიდევ ბევრი უცნობი დეტალია, ამიტომ დაველოდოთ მათ გამოაშკარავებას".

ევროპარლამენტარმა, მარინა კალიურანდმა საარჩევნო უბნებზე აქცენტი შეზღუდული შესაძლებლობების მქონე პირებისთვის სათანადო პირობების არარსებობაზე გააკეთა.

"არჩევნების პროცესს 07:30-დან მოყოლებული ვაკვირდებით. ჩვენ წავედით და ვნახეთ, როგორ გაიხსნა საარჩევნო ოლქები, როგორ დაილუქა საარჩევნო ურნები. ჩვენ ვნახეთ, რომ ადამიანები მუშაობენ. ჩვენ ვნახეთ, რომ ამომრჩევლები მოდიან. რა თქმა უნდა, გარვეული რაღაცები შეიძლებოდა გაკეთებულიყო იმისთვის, რომ შეზღუდული შესაძლებლობების მქონე პირებს ხმის მიცემა გამარტივებოდათ. ჩვენ ვიყავით დრამის თეატრში, სადაც კიბე იყო ძალიან ვიწრო, რაც არამგონია, რომ ხმის მიცემის ყველა მსურველისთვის იქნებოდა გამოსაყენებლად მარტივი. მე ამიხსნეს, რომ შეზღუდული შესაძლებლობების მქონე პირები წინასწარ უნდა დარეგისტრირებულიყვნენ. ასე რომ, პროცესის გაუმჯობესება შესაძლებელია. მაგრამ იქამდე, სანამ საბოლოო შედეგებზე საუბარს შევძლებდე, 7-8 საათმა უნდა განვლოს".

კალიურანდმა მიხეილ სააკაშვილზე კომენტარის გაკეთებისგან თავი შეიკავა.