"ძალიან გაბრიყვებულია გახარია და ჩვენ ვნახეთ, როგორ დაკარგა საკუთარი სახე, თავი და ყველაფერი დაკარგა ამ ადამიანმა", — ასე ეხმაურება პრემიერმინისტრი, ირაკლი ღარიბაშვილი ექსპრემიერი გიორგი გახარიას განცხადებას იმის შესახებ, რომ კიდევ ერთმა ექსპრემიერმა და მისი ყოფილი გუნდის დამფუძნებელმა, ბიძინა ივანიშვილმა იმედი გაუცრუა. ღარიბაშვილი ისევ იმეორებს, რომ გახარია ექსპრეზიდენტ მიხეილ სააკაშვილის თამაშს თამაშობს, სააკაშვილის კომპრომატებით შანტაჟში ადანაშაულებს.

"მე ადრე ვთქვი, რომ ამას მოხერხება უნდა, იყო კაცი პრემიერმინისტრი და გახდეს სააკაშვილის მარიონეტი. სააკაშვილის ბუნებრივი მოკავშირე არის გახარია, ეს ძალინ მარტივი წასაკითხია ინფორმაცია რომ არ გქონდეს ადამიანს, ძალიან მარტივად იკითხება, თავიდან ბოლომდე არის სააკაშვილის თამაშში ჩართული.

არ მინდა დამატებითი სპეკულაციები ამ საკითხზე, მაგრამ უამრავი ინფორმაციები არსებობს და ძალიან მარტივად იკითხება, რომ, ალბათ, როგორც ჩანს, რაღაც დიდი ვალი აქვს სააკაშვილის მიმართ და კომპრომატებით მართავს ამ გაბრიყვებულ ადამიანს. ერთი რამ მინდა ვთქვა, რომ თუ ვინმეს იმედები გაუცრუა გახარიამ, ეს არის თავად გიორგი გახარია", — განაცხადა მან.

25 სექტემბერს, გახარიამ თქვა, რომ ქართული ოცნების დამფუძნებელმა, ბიძინა ივანიშვილმა მისი ნდობა არ გაამართლა. ამის შესახებ მან მაშინ განაცხადა, როცა ჟურნალისტმა შეახსენა, რომ ადრე საუბრობდა ივანიშვილის "უმნიშვნელოვანეს როლზე" ქართული ოცნების მიმართ ნდობის საკითხში და ჰკითხა, ახლაც იმავე აზრზე იყო თუ არა. გახარიამ ამ კითხვას უარყოფითი პასუხი გასცა და თქვა: "ივანიშვილმა ნდობა არ გაამართლა. მარტო ჩემი არა, მოქალაქეების".

ქართული ოცნების თავმჯდომარე, ირაკლი კობახიძე გახარიას ამ განცხადებას ირონიით პასუხობს. ის ამბობს, რომ ივანიშვილი "ბავშვობიდან ოცნებობდა" როგორმე გახარიას იმედები გაემართლებინა.