ქართული ოცნების თავმჯდომარის, ირაკლი კობახიძის განცხადებით, საქართველოს ახალგაზრდა იურისტთა ასოციაციის მიერ არჩევნებამდე 2 კვირით ადრე შეტანილი სარჩელი მაჟორიტარული სისტემის არაკონსტიტუციურად ცნობის მოთხოვნით, ემსახურება იმ ინტერესებს, რომელსაც მიჰყვება ნაციონალური მოძრაობა.

"როგორც ცნობილია, ერთ-ერთმა არასამთავრობო ორგანიზაციამ, ახალგაზრდა იურისტთა ასოციაციამ შეიტანა კონსტიტუციური სარჩელი იმ მაჟორიტარული საარჩევნო სისტემის არაკონსტიტუციურად ცნობის მოთხოვნით, რომლის საფუძველზეც 2 კვირაში მუნიციპალური არჩევნები ტარდება. ყველას გვახსოვს, რომ რევოლუციური სცენარის ხელშეწყობის მიზნით 2016 წელს ანალოგიური სარჩელი საკონსტიტუციო სასამართლოში ნაციონალურმა მოძრაობამ თავისი სახელით შეიტანა. მაშინ ნაციონალური მოძრაობის ძალისხმევა წარუმატებელი აღმოჩნდა და საკონსტიტუციო სასამართლომ ნაციონალური მოძრაობის აბსურდული სარჩელი არ დააკმაყოფილა და რევოლუციური სცენარიც ჩაიშალა, ეს მოხდა 2016 წელს.

შემაშფოთებელია, რომ ის, რაც ნაციონალურმა მოძრაობამ 5 წლის წინ ღიად, თავისი სახელით განახორციელა, ახლა არასამთავრობო ორგანიზაციის სახელით კეთდება", — ამბობს კობახიძე.

მისივე თქმით, ამ საკითხზე არჩევნებამდე 2 კვირით ადრე ყურადღების გამახვილება მანკიერ პოლიტიკურ მოტივზე მეტყველებს.

"შემაშფოთებელია, რომ არჩევნებამდე 2 კვირით ადრე ახალი აბსურდული სარჩელით არჩევნებისთვის პრობლემის შექმნას გეგმავს ორგანიზაცია, რომელიც არასამთავრობო ორგანიზაციის სტატუსს ატარებს. როდესაც 3 თვის წინ ფართო პოლიტიკური კონსენსუსის საფუძველზე მიღებულ კანონზე არც კანონის მიღების პროცესში და არც მისი მიღებიდან 3 თვის განმავლობაში არაფერს ამბობ და შემდეგ ამ კანონს ყველაზე აქტიურ წინასაარჩევნო ფაზაში, არჩევნებამდე 2 კვირით ადრე აპროტესტებთ, ეს ფაქტი სარჩელის უკან მდგარ უაღრესად მანკიერ პოლიტიკურ მოტივზე, ბუნებრივია, თავისთავად მეტყველებს", — თქვა მან.

საქართველოს ახალგაზრდა იურისტთა ასოციაცია ადგილობრივი თვითმმართველობის არჩევნებისთვის დადგენილი მაჟორიტარული საარჩევნო ოლქების საზღვრების არაკონსტიტუციურად ცნობას ითხოვს. საიამ საკონსტიტუციო სასამართლოს ამ მოთხოვნით უკვე მიმართა. ორგანიზაციის განცხადებით, მცირერიცხოვან ოლქებში ამომრჩეველთა საარჩევნო ხმის წონა მრავალრიცხოვან ოლქებში რეგისტრირებულ ამომრჩეველთა ხმის წონასთან შედარებით მცირეა.

ორგანიზაციის განცხადებით, მცირერიცხოვან ოლქებში ამომრჩეველთა საარჩევნო ხმის წონა მრავალრიცხოვან ოლქებში რეგისტრირებულ ამომრჩეველთა ხმის წონასთან შედარებით მცირეა.