ქართული ოცნების აღმასრულებელი მდივნის, მამუკა მდინარაძის განცხადებით გავრცელებული ჩანაწერები "ფონის შემზადებაა" საჯარო პირების შესახებ სხვა ჩანაწერების გასასაჯაროებლად. მისი თქმით, აღნიშნული ჩანაწერების გავრცელებას ნაციონალური მოძრაობა გეგმავს. მდინარაძე ამბობს, რომ საუბარია პირადი ცხოვრების ამსახველ ჩანაწერებზე ან/და მის ფაბრიკაციაზე.

"გვაქვს ინფორმაცია, რომ ნაციონალური მოძრაობის კუთვნილი ტელეკომპანიების მიერ გუშინდელი დღიდან აგორებული ბოლშევიკური კამპანია ემსახურება ფონის შემზადებას პირადი ცხოვრების ამსახველი გარკვეული ჩანაწერების თუ მათი ფაბრიკაციის გავცელებისათვის, რომლის ინტერნეტში ატვირთვა, ჩვენი ინფორმაციით, მომდევნო დღეებში ნაციონალური მოძრაობის მიერ ქვეყნის ფარგლებს გარეთ იგეგმება.

ჩვენი ინფორმაციით, აღნიშნული ჩანაწერები უკავშირდება საჯარო პირებს და და მიზნად ისახავს წინასაარჩვენოთ საზოგადოებაში მღელვარების გამოწვევას. ჩანაწერის შინაარსიდან გამომდინარე, რაც ჩვენთვის ცნობილია, მხოლოდ ბოლშევიკური აზროვნების მქონე ადამიანებს შეიძლება თავში აზრად მოუვიდეთ მათი გავრცელება", — განაცხადა მამუკა მდინარაძემ.

დეპუტატი ფიქრობს, რომ ჩანაწერების გავრცელების შემთხვევაში ენმ "საზოგადოების მღელვარების და რისხვის ობიექტი" გახდება.

"კატეგორიულად ვაფრთხილებთ ყველას, თავი შეიკავონ აღნიშნული ქმედებისგან. ამასთან, დარწმუნებულნი ვართ, რომ თუ ისინი ამგვარ სიბინძურეს იკადრებენ და აღნიშნულ ჩანაწერებს გაავრცელებენ, საზოგადოების მღელვარების და რისხვის ობიექტი სწორედ ნაციონალური მოძრაობა და მისი თანამზრახველები გახდებიან", — განაცხადა მდინარაძემ.

მისი თქმით, ეს ინფორმაცია ქართულმა ოცნებამ "ნაციონალური მოძრაობის რიგებიდან" მიიღო. დეპუტატმა სამართალდამცავ ორგანოებს მოუწოდა საქმე გამოიძიონ და მის შესახებ საზოგადოებას სრულყოფილი ინფორმაცია მიაწოდონ.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

გაიგე მეტი: